Ua de las organizacions qu’estúdia lo climat terrèstre, Berkeley Earth, que confirmè ua dada climatica que demòstra que las darrèras 20 annadas l’umanitat non a hèit absolutament pas arren entà lutar contra lo cambiament climatic. Se mei de 25 annadas a, tots los governaments e organizacions afirmavan que calèva har causas entà arrestar que lo climat actuau monte un gras e miei, en 2024 qu’ei estat confirmat que lo climat mondiau a dejà montat un gras e miei mei.
Segon aqueth organisme, Berkeley, la Tèrra qu’auré dejà despassat aquera chifra l’annada passada, çò ei en 2023, pr’amor que la temperatura mondiau auré dejà montat mei d’un gras e miei per rapòrt a l’epòca preindustriala. Dab aquera chifra, ne’s pòt pas mei amagar mei que la luta contra lo cambiament climatic ei solament aquò, paraulas, e arren mei, e que los acòrs suu climat de París ne son pas arren.
De rebrembar qu’un gras e miei qu’èra la sola frontèra climatica que tots los estats de la planeta estón d’acòrd que calèva empachar d’i arribar. Mes adara Berkeley que confirmè que lo climat mondiau avèva dejà crotzat aquera frontèra e que’s pensa que las consequéncias climaticas despuish adara que pòden estar òrras entà la planeta. Tanben cau díser que solament qualcunes dias abans, l’organisme europèu de susvelhament deu climat, Copernicus, tanben confirmè que la temperatura mondiau dejà avèva montat entre 1,3 e 1,4 gras mei per rapòrt au sègle XVIIII.
2023, l’annada mei cauda
En mei, d’aquò, los dus organismes confirmèn que 2023 qu’estó l’annada mei cauda de l’istòria modèrna jamei enregistrada (çò ei 174 annadas) e qu’aquò, çò de mei segur, qu’ei tanben la mei hauta de las darrèras 100.000 annadas. Aquò entrainaré un climat dab quasi 3 gras mei a nivèu mondiau abans de la fin de sègle, çò que seré òrre entà l’umanitat mes tanben entà la vita a la planeta dens hèra regions.
Aquò, segon Berkeley qu’ei un hèt plan grèu, pr’amor que’s demòstra que los governaments mondiaus an pas arren hèt las darrèras 25 annadas entà lutar contra lo cambiament climatic, e lo climat qu’ei mei caud. E maugrat qu’aquera annada foguèssen arrestadas au 100% las emissions de dioxide de carbòni pertot, la temperatura mondiau que contunharé la soa creishença 1,8 gras mei .
Mes autan qu’avem dejà montat un gras e miei en 2024, e la temperatura que montarà hèra mai, quasi 3 gras abans de la fin de sègle. Totun, Berkeley tanben voló rebrembar que 2023 èra estada ua annada hòrt mei cauda que çò que los cercaires avèvan pensat.
La Redaccion
Cronica d’aguest article sus l’espaci Natura de Ràdio País :
