Segon un novèl estudi, l’eiretatge genetic denisovan auriá daissat una traça dins nòstra santat. L’estudi confirma qu’una varianta genetica qu’afècta la regulacion del zinc e que seriá una adaptacion al freg dels denisovans encara es entre nosautres.
Fins ara, aquel contribucion genetica denisovana a nòstra espècia seriá la pus importanta jamai trobada. Pasmens, aquela adaptacion al freg auriá daissat una consequéncia negativa en nòstra espècia pr’amor qu’entraïna de desòrdres neuropsiquatrics en los umans modèrnes.
Aquela varianta genetica es estada trobada per de cercaires de l’Institut de Biologia Evolutiva (IBE) de l’Universitat Pompeu Fabra (UPF) de Barcelona. L’estudi, publicat dins lo numeric PloS Genetics, confirmariá la predisposicion dels umans modèrnes a patir de desòrdres neuropsiquiatrics a causa d’aquel gèn.
Lo rescontre amb los denisovans
Nòstra espècia daissèt Africa fa aperaquí 60 000 ans. Intrèt en Asia quand ja i aviá denisovans ailà. De segur, s’i tenguèt de luchas mas tanben s’i constituiguèt de grops amics e mai encara d’ibridacion entre aquelas doas espècias ominidas. D’efièch, los cercaires dempuèi fa longtemps an confirmat qualque carga genetica denisovana en nòstra espècia.
Los cercaires an troba un dels gèns denisovans pus importants en los umans modèrnes. Aquel element genetic ajudèt fòrça l’espècia denisovana a endurar lo fred. En nosautres a un ròtle dins lo metabolisme cellular mas çò de pièger seriá qu’es la causa principala de desòrdres neuropsiquiatrics coma la depression o l’esquizofrenia actualas de fòrça personas a l’ora d’ara. E la siá origina genetica es denisovana.
Totun, en los denisovans, aquela adaptacion genetica entraïnèt de poder melhor superar lo clima de l’environament ont demoravan. Aquò vòl dire que, a l’origina, foguèt una adaptacion positiva. Mas quand nòstra espècia se mesclèt amb los denisovans, eiretèt aquela varianta genetica, qu’es pas brica positiva per nosautres.
“Avèm trobat, amb l’ajuda d’una analisi genomica, que la varianta genetica espepissada a per causa dirècta nòstre eiretatge denisovan”, çò diguèt Ana Roca-Umbert, una cercaira que participèt a l’estudi. En mai d’aquò, los cercaires an evitat de parlar d’un possible eiretatge dels neandertalians, amb qui nòstra espècia tanben se mesclèt, pr’amor que los neandertalians coneguèron pas aquela mutacion genetica.
“Foguèt una adaptacion positiva al començament, çò apondèt Jorge Garcia-Calleja, que tanben participèt a l’estudi. Es una varianta del gèn SLC30A9 e uèi tanben pòt èsser trobada en cèrtas populacions umanas, çò qu’es negatiu”.
Los cambiaments patits se tenguèron al nivèl cellular, çò apondèron los cercaires. Quand foguèt descobèrt que lo gèn èra responsable de la regulacion dels nivèls de zinc, analisèron amb mai de prigondor cossí aquò s’èra pogut debanar, car los nivèls de zinc en las populacions africanas e asiaticas uèi son plan desparièras.
D’efièch, lo zinc es essencial per la santat umana. Balha d’informacion vèrs l’interior e l’exterior de la cellula. Se i pas pro de zinc, los umans patisson de grèus problèmas neurologics e immunitaris. Lo laboratòri a identificat aquela adaptacion genetica coma una causa de cambiaments del metabolisme. E a confirmat que benlèu foguèt una adaptacion al clima freg ont demoravan los denisovans.
Per ansin, los cercaires dison qu’aquel eiretatge actual denisovan poiriá provocar de grèus desòrdres mentals en d’europèus e d’asiatics. Car lo nivèl de zinc genèra un sistèma nerviós plan mai excitat e es fondamental per la santat mentala de las personas
Dich d’un autre biais, d’aver aquela variacion genetica provòca una mai fòrta predisposicion a desvolopar de patologias psiquiatricas coma l’anorexia, l’iperactivitat, l’autisme, los desòrdres bipolars, las depression, las obsessions compulsivas e tanben l’esquizofrenia. Mas los africans an pas aquela adaptacion genetica.
S’aquela varianta comencèt après l’ibridacion d’espècias en Asia, arribèt puèi en Euròpa e America. D’efièch, pòt èsser trobada un pauc pertot, franc d’Africa. Los cercaires an tanben identificat d’autres gèns denisovans, coma l’EPAS1, eiretat tanben dels denisovans per s’adaptar a viure en de luòcs mai nauts e que uèi sonque es trapat en los tibetans. Totun, la varianta denisovana descricha pòt ara èsser trobada en d’umans de tota la planeta mas pas en Africa.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
