DE VÈRMES GIGANTS FA 20 MILIONS D’ANS
De vèrmes gigants que visquèron fa mai de 20 milions d’ans foguèron trapats en çò que poiriá èsser qualificat coma la descoberta pus estonanta del mond de la paleontologia dels darrièrs ans. Aital, los vèrmes de tèrra trapats serián de predators que visquèron dins lo sòl de l’ocean marin e serián arribats de far mai de 2 mètres de longor. La tròba se passèt dins la mar pròcha de l’illa de Taiwan.
Per ansin, una còla de cercaires de l’universitat Simon Fraser a confirmat l’evidéncia scientifica de vèrmes de 2 mètres de longor que demoravan dins la mar de China fa 20 milions d’ans. La tròba foguèt publicada dins lo numeric Scientific Reports e seriá la resulta de la rebastison paleontologica de divèrsas rèstas fossilas d’aqueles vèrmes preïstorics.
Segon un dels autors d’aquel estudi, Yu-Yen Pan, los fossils foguèron trobats en un airal amb de ròcas situat prèp de la còsta de l’illa de Taiwan. Los fòssils foguèron trapats pendent un estudi icniologic. “M’estonèri fòrça, lo primièr còp que descobriguèri aqueles fossils, çò diguèt Yu-Yen Pan. D’autres fossils semblables fan sonque qualques centimètres de longor mas aqueles èran gigants : dos mètres de longor e entre dos e tres centimètres de diamètre. Tanben sospecham qu’almens, sus una part del còrs, portavan de plumas. Jamai non èra estat trobat un organisme coma aquel”.
Pan e sos collègas de la còla internacionala que descobriguèron aqueles vèrmes preïstorics nomenèron la creatura Pennichnus formosae. Tot aquò se passèt quand estudiavan divèrses estrats del Miocèn (fa entre 22 e 20 milions d’ans) dins lo nòrd-èst de Taiwan. La còla foguèt ajudada per de biològs, fotografes e especialistas marins per poder rebastir las vertadièras mesuras d’aqueles vèrmes amb sonque los fossils trapats al fons de la mar.
Un descendent actual
Uèi lo jorn i a un vèrme, fòrça mai pichon, conegut amb lo nom de vèrme de Bobbit, que tanben es un predator. Tròba sas predas amb sas antenas e puèi dobrís lèu la boca per las caçar. Un còp aquò fach, torna lèu-lèu al fons del sable d’ont sortiguèt. Los scientifics pensan que poiriá èsser un descendent d’aquel vèrme del Miocèn.
Los cercaires tanben trapèron fòrça rèstas de fèrre en aquel fossil, çò que poiriá entraïnar que lo vèrme bastiguèsse una sòrta de cauna dins lo sable amb un mur de proteccion per s’i amagar dedins. De remembrar que i aguèt de vèrmes marins predators long de tota l’edat paleozoïca (a partir de fa 400 milions d’ans) mas los trapar es fòrça dificil pr’amor del teissut qu’an lors organismes. La tròba de Pennichnus formosae seriá doncas una rara escasença de comprene cossí visquèron aqueles estonants organismes marins fa 20 milions d’ans.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
