LOS PRIMIÈRS LAMBEOSAURIDS DEMORÈRON AL PIRENÈU
Los primièrs dinosaures apertenents a la familha dels lambeosaurids (dins lo genre d’adrosaurids) demorèron als Pirenèus. Aquesta es la resulta d’un estudi fach per l’Institut Catalan de Paleontologia Miquel Crusafont e lo Musèu de la Conca Dellà e publicat al numeric internacional Cretaceu Research. Segon l’estudi, l’espècia seriá arribada als Pirenèus prèp de 300 00 anas abans de çò que se pensava.
Los lambeosaurids son un grop d’adrosaures fòrça celèbres per la cresta voida qu’avián sul cap que, segon se pensa, poiriá èsser restacada amb la comunicacion visuala sexuala d’aquesta espècia. Demorèron en Euròpa fa 69 milions d’annadas e, segon aqueste darrièr estudi, serián arribats als Pirenèus (en aquela epòca una illa) 275 000 ans abans de çò que se pensava, çò es dich d’una autra manièra, que los fossils de lambeosaurid europèu mai ancian jamai trapats per paleontològs serián aqueles trobats ara al Pirenèu.
L’estudi es basat en la tròba de divèrses fossils de lambeosaurids trapats pendent los darrièrs tres ans al siti d’Els Nerets, prèp del vilatge catalan de Tremp, al Pirenèu. L’espècia seriá arribada d’Asia e quand i arribèron cambièron totalament l’ecosistèma ont demorèron.
En aquela epòca los Pirenèus èran una illa nomenada l’illa ibero-armoricana qu’èra formada per una archipèla que puèi seriá Euròpa. Tot aquò se seriá debanat durant lo Cretacèu e a l’illa i arribèt aquela espècia de dinosaure qu’atanben avián una origina asiatica.
Un pònt de tèrra
La primièra migracion de lambeosaurids cap a aquela illa se seriá passada coma en d’autras migracions de fauna de l’istòria de la planeta. I aguèt d’epòcas que la mar èra baissa e se formavan de pònts de tèrra entre las illas e ansin arribèt aquela espècia als Pirenèus. Un còp arribats lo registre fossil cresquèt, çò que fa pensar que la sieuna istòria es tanben l’istòria d’una reüssida biologica.
“Avèm estudiat mai d’un fossil d’adrosaure lambeosaurid en Els Nerets pendent mai de tres annadas, çò diguèt Bernet Vila, que participèt en aquel estudi e paleontològ de l’Institut Catalan de Paleontologia Miquel Crusafont (ICP). La sieuna arribada venguèt una vertadièra revolucion biologica pr’amor de son lèu espandiment”. Segon foguèt confirmat per la còla de paleontològs qu’estudièt aquela espècia, dirigida per Simone Conti, ne foguèron trobadas de rèstas d’almens tres especimèns diferents.
Lo succès evolutiu dels lambeosaurids , a mai d’èsser demostrat qu’arribèron fòrça abans als Pirenèus, seriá confirmat pel fach que tanben foguèron trapadas de pesadas e de rèstas divèrsas que soslinharián que demorèt en ma d’un bioma d’aquela illa. Cossí que siá, la descobèrta demostrèt que Catalonha ven tanben un país ric en de rèstas de dinosaures en la planeta, sustot d’espècias que demorèron just abans de lor extincion en la Tèrra. Es çò qu’afirma aquel estudi e encara d’autres anteriors sus la populacion de dinosaures que visquèt en Euròpa en aquela l’epòca.
La Redaccion
