Un nòu estudi realizat per de cercaires de l’Institut d’Ecologia de Leibnitz a confirmat que divèrses tròces de microplastics foguèron trobats dins las raices de beces, un arbre tras que comun a Euròpa. Los tròces mesuravan entre 5 e 10 micromillimètres e pòdon aital dintrar dins lo sistèma de las raices dels beces (Betula betula), un arbre europèu que s’es tanben espandit per Asia.
D’efièch, una de las pròvas scientificas balhadas per la còla qu’estudièt aqueles arbres mòstra cossí i a maites fòrça pichons tròces de plastic dins las raices de mai d’un beç après patir de sòl polluit durant aperaquí 5 meses. La tròba sonque aguèt luòc après que se foguèt estudiat amb de tecnicas microscopicas especialas aqueles arbres. E la descobèrta es una plan marrida nòva per l’environament mondial, mai que mai l’europèu.
“Los beces foguèron utilizats per assajar d’arrestar la pollucion industriala pr’amor que la colonizacion d’un airal per aquel tipe d’arbres ajuda plan car entraïna apuèi l’arribada de plusors comunautats de micròbis que luchan contra la pollucion de l’environament per de fèrre e de plastics. E la descobèrta de divèrses tròces de microplastic dins las raices d’aqueles arbres foguèt estonanta”, çò ditz Kat Austen, d’aquel institut e que dirigiguèt aquel estudi scientific dels beces.
Segon aquel estudi, los beces son d’arbres plan comuns dins los païsatges europèu, asiatic e american que pòdon colonizar lèu-lèu de sòls desequilibrats e ajudar tornarmai amb la colonizacion de regions desforestadas. La singularitat del beç es qu’a de raices que demòran al sòl e qu’aital absorbisson de microplastics mai que d’autras espècias d’arbres. La tòca de l’estudi èra de mostrar cossí l’arbre podiá afectar la pollucion amb de microplastics, e son obratge foguèt demostrat scientificament amb la resulta positiva trapada pels cercaires de la pollucion dels arbres, en mai de la del quite sòl. Per trapar los microplastics los cercaires pintèron los tròces de plastic e aital los poguèron apuèi trobar dins las raices dels beces.
Un estudi que durèt cinc meses
L’estudi durèt cinc meses. Puèi estudièron las raices dels beces en tot cercar de microplastics pintats. Mai de 64 tròces de raices foguèron analisats amb una tecnologia microscopica. Aürosament, sonque 6 tròces d’aquelas raices mostrèron de microplastics, çò que benlèu vòl dire que i a de tanben de pollucion de plastic dins los arbres mas qu’es pas gaire nauta. Pasmens, las raices qu’avián de microplastics n’avián entre un e quatre tròces.
Aital, la mejana de tròces de plastic pichonèl seriá d’entre un 5% e un 17% segon l’arbre estudiat. Es per aquò que los cercaires vòlon pas encara prepausar una teoria definitiva mas demandan un estudi mai prigond sus aquel obratge environamental. De remembrar que d’estudis anteriors sus de fuèlhas de lachuga confirmèron que i aviá dedins entre 0,2 e 2 micromillimètres de plastic. E los cercaires pensan que, benlèu, lo nivèl de pollucion dels arbres per de plastics seriá superior.
“Trapar de microplastics dins las raices dels beces confirma que la pollucion umana s’espandís de mai en mai, non sonque al sòl mas tanben dins la vegetacion, çò diguèron los cercaires. Ara çò que cal far es estudiar amb mai de prigondor los efièches de la pollucion per de plastics sus la santat dels beces e d’autras espècias d’arbres pr’amor que, se foguèsse aital, la pollucion environamentala seriá, uèi lo jorn, plan màger e plan mai grèva que çò que s’èra pensat”. L’estudi l’a publicat lo numeric internacional Science of The Total Environment.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
