COSSI FOGUÈT LO MEGALODON ?
Malgrat que i aja agut divèrses estudis aquestes darrièrs ans sus cossí èra e cossí viviá la granda làmia preïstorica megalodon, encara ne manca fòrça per ne conéisser corrèctament e amb prigondor sa biologia. D’efièch, sabèm qu’Otodus megalodon foguèt la màger làmia que jamai visquèsse sus la planeta (fasiá aumens 15 m de longor). Mas aquò s’interprèta en foncion de las dents trapadas. Pr’amor que sonque es estat trobat de dents de megalodon e pauc mai.
Segon qualques cercaires, poiriá aver viscut coma o fa uèi la granda làmia blanca (Carcharodon carcharias). Mas i a un problèma: las dents de megalodon trobadas apertenon a un unic especimen. E segon plusors cercaires de l’Universitat de Riverside (Califòrnia), de l’Universitat DePaul (Chicago), e l’Universitat estatala de Forts Hays, n’i pas pro amb aquò. Se pòt pas dire d’un biais scientific cossí foguèt megalodon amb aquelas unicas dents.
Aital, la sciéncia actuala sonque poiriá confirmar que lo megalodon foguèt una espècia escantida de làmia gigantassa que visquèt entre las epòcas del Miocèn e del Pliocèn, çò es fa entre 15 e 2,6 milions d’annadas. Segon sas dents, poiriá aver fach entre 15 e 20 mètres de longor e per aquel motiu deviá èsser un predator dels pus perilhoses dels oceans d’aquela epòca. De segur, devorava de balenas e d’autres grands mamifèrs.
Una esqueleta de cartilatge
Mas l’esqueleta de las làmias es de cartilatge e doncas demorèron pas las esqueletas d’aquela làmia, franc de las dents. Mas i a de mai en mai de cercaires que pensan que benlèu foguèt pas res mai qu’una granda làmia, sonque un pauc màger. “La granda làmia blanca aperten a la familha dels Lamnidae amb d’autras làmias que son endotermicas (parcialament de sang cauda). E es per aquò qu’a pogut venir un grand predator, çò diguèt Kenshu Shimada, paleobiològ del departament de las sciéncias del Musèu d’Istòria Naturala d’Stenberg. Megalodon aperten pas a aquela familha mas qualques cercaires imaginèron que deviá èsser endotermic.”
Pasmens, un estudi nòu demòstra qu’auriá pas la forma descricha, mas una autra plan diferenta. Segon aquel estudi, se pòt pas restacar una làmia qu’aperten pas a aquela familha (Megalodon) amb l’endotermia. E doncas se pòt pas conéisser plan scientificament cossí foguèt realament lo megalodon.
Segon Jake Wood, de l’Universitat de Califòrnia a Riverside, “malgrat qu’Otodus megalodon poiriá èsser estat semblable a de làmias modèrnas, avèm pas de pròvas definitivas de sa forma definitiva. Tot çò que s’es dich fins ara del megalodon poiriá pas èsser res mai que d’especulacion. I a pas cap de pròva scientifica darrièra la descripcion actuala d’aquela làmia preïstorica”.
A mai, segon divèrses cercaires, cal trapar una esqueleta entièra de megalodon per n’aver sa forma. O un bon tròç. E aquò, çò remembran, s’es pas jamai debanat encara. Mas la desconeissença de la forma del megalodon buta encara mai nòstra imaginacion. E per aquela rason la paleontologia es importanta uèi, pr’amor qu’es la sola sciéncia que pòsca demostrar cossí foguèron e cossí visquèron d’espècias fossilas. Amb de pròvas scientificas. Lo darrièr estudi fach sul megalodon foguèt publicat dins lo numeric Historical Biology.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
