Un nau estudi realizat pera Universitat d’Austràlia deth Sud soslinhe qu’arrir non ei solament important entara imatge qu’es autes an de nosati mès que tanben ac ei pr’amor que mòir es muscles dera fàcia hè èster mès positiu e hè tanben èster tostemps mès animat. E ac podèren demostrar scientificaments.
Er estudi ei important pr’amor qu’es darrèrs estudis scientifics demòstren que i a fòrça mès gent inquieta pera situacion dera Covid-19. I a mès e mès simptòmes ena societat que i a fòrça mès casi d’ansietat e depression pr’amor d’aguesta pandèmia. Er estudi, publicat ena revista scientifica online Experimental Psychology confirmarie, donques, que cau arrir mès que jamès.
Mòir es muscles dera fàcia ei important donques entà arreconéisher es diuèrses expressions faciaus mès tanben es possibles emocions que pòt auer una persona quan parlam damb era. A mès, segontes un des cercaires que trabalhèc en estudi, Fernando Marmolejo-Ramos, arrir tanben ei important se volem auer ua bona santat mentau.
“Son es nòsti muscles que diden quan èm erosi e tanben son eri es que diden entath mon qu’ac èm, çò diguec Dr Marmolejo-Ramos. Auem trapat qu’ensajar d’arrir ei ua estimulacion entara amigdala – eth centre emocionau deth cervèth- e açò provòque era liberacion de neurotransmissors que hèn èster en un estat emocionau mès positiu”.
E açò, ath còp, pòt tanben provocar qu’era recepcion des diuèrses estimulacions positiues qu’arrecep eth cervèth siguen mès nombroses. Açò tanben vò díder qu’era connexion entre era accion e era percepcion des persones ei fòrça mès grana que non pensam pr’amor que soent es nòstes accions an coma causa dirècta es estimulacions visuaus. E arrir que n’ei ua des mès importantes.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
