Una còla arqueologica internacionala de cercaires alemands e curds trapèt las roïnas d’un ancian palais de Mitanni, empèri tradicionalament enemic al long de l’istòria dels egipcians e ititas, de fa 3400 ans, prèp del fluvi Tigre a Kemune, en Curdistan. La tròba es estada considerada coma una de las pus importantas de la region dempuèi de decennis.
“L’Empèri de Mitanni es un dels pus desconeguts del Pròche Orient, çò diguèt Ivana Puljiz, arqueològa de l’Institut pel Pròche Orient de Tübingen. Avèm sonque d’informacion sul palais de Mitanni de Tell Brak, en Síria, e de las vilas de Nuzi e Alalakh. La capitala meteissa d’aquel empèri es pas encara coneguda amb seguretat”.
Lo sit compren una bastida amb de murs de 2 mètres de nautor e divèrsas cambras mas tanben i a de rèstas de pinturas sus de parets amb las colors roja e blava. A l’epòca antica, lo palais de Kemune èra situat sus una terrassa sus la val a 20 mètres al dessús de Tigre. E i aviá un mur gigant per estabilizar lo palais sul terren.
D’epòcas d’usatge desparièras
Segon la còla arqueologica que descobriguèt aquel palais, i aguèt doas fasas d’usatge: “Aquò vòl dire que foguèt abitat pendent un periòde tras que long de l’istòria d’aquela region”, çò afirmèt Puljiz. Dins lo palais, los arqueològs poguèron identificar plusors cambras (fins a 8). Tanplan trapèron 10 tauletas de fanga amb d’inscripcions en cuneïfòrme de Mitanni.
“Una de las tauletas confirma que Kemune es l’anciana vila de Zakhiku, que ne parlan en divèrsas fònts del Pròche Orient d’aquela epòca, e qu’existiguèt dempuèi aperaquí l’an 1.800 abans lo Crist, çò soslinhèt l’arqueològa. Aquò vòl dire qu’aquela vila e tanben lo palais de Zakhiku existiguèron almens pendent pus de 400 ans”. Ara cal far mai de recèrcas arqueologicas per poder confirmar que totas aquelas donadas son corrèctas.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
