L’estat de Queensland es lo segond màger estat d’Austràlia pr’amor del sieu territòri mas lo tresen pr’amor de la siá populacion. Es tanben conegut amb lo nòm d’estat del Solei, e es situat al nòrd-èst d’aquel continent. A 1,7 milions de quilomètres cairats e doncas es fins a 7 còps màger que lo Reialme Unit.
Las meravilhas naturalas tropicalas de Queensland forman una longa lista: de sèlvas plan ancianas, de plajas de sable blanc e encara la màger barrièra de coralh de la planeta. La siá geografia, idrografia e biodiversitat doncas son tras que singularas e, segon, la region, tanben plan desconegudas.
La geografia de l’estat es tan divèrsa que cal poder la devessir en desparièras partidas; la còsta orientala, lo Cap Yòrk, l’interior e las montanhas. Cada zòna a un clima e morfologia unicas, çò que balha a Queensland una biodiversitat estonantas.
Lo releu de l’estat es contrarotlat per la Granda Sèrra Divisòria (Great Dividing Range), una cadena de montanhas e replanats parallèla a la còsta èst. Las montanhas son tanben un mur climatic car retenon l’umitat de l’ocean Pacific e crean un airal umid e fèrtil ont i demòra la majoritat de la populacion. Tanben es ont i a mai sèlva tropicala.
La Peninsula del Cap Yòrk, d’un autre costat, es una zòna situada al nòrd de Queensland e es un dels darrièrs airals salvatges de la planeta amb de sabanas tropicalas, de flumes salvatges e de longs paluns jos un clima totalament monzonic.
Per çò que tòca a l’interior, a l’oèst d’aquelas montanhas, lo releu ven aicí mai sec. Son las nomenadas Tèrras Bassas Centralas amb d’èrba e desert, ont l’activitat principala es l’elevatge industrial. Las montanhas son pas gaire nautas e sonque qualcunas an cèrta importància geologica; lo Mont Bartle Frere, a 1.622 mètres de nautor e es lo màger som de Queensland. Es al nòrd de l’estat e al torn i a una sèlva prigonda e amb de nívols basses.
Las autras doas sèrras d’aqueste estat son las Glass House Mountains, al sud-èst, amb de nuclèus volcanics de fa mai de 25 milions d’ans, e las Carnavon Range, mai a l’interior e plan erosionadas a amb de gòrjas estonantas.
Se parlam de flumes, Queensland a una ret idrografica plan complèxa pr’amor que i a flumes que neisson a las montanhas e desbòcan al Pacific, coma lo flume Fitzroy, mas tanben los flumes Burdekin, e Brisbane. Lo mai long de l’estat es lo Flinders (1 000 km), situat al nòrd-oèst. A l’interior, totun, de flumes coma Diamantina o Cooper Creek son temporals e pendent ans son sonque sable mas quand arriba la pluèja cambian lo paisatge, que ven un oasis verd. Fin finala, a l’interior, plan sec, i a la Granda Conca Subterranèa, lo màger aqüifèr de la planeta.
Queensland a divèrsas vilas importantas e la populacion estatala se devessís entre la còsta, mai abitada, e l’interior plan mens abitat. I a una populacion totala de 5,4 milions d’abitants que demòran a Brisbane (2,6 milions d’abitants), mas tanben Gold Coast, Cairns e encara Townsville e Rockhampton.
Brisbane es la capitala modèrna, amb un clima subtropical plan agradiu. Gold Coast es celèbra per las siás plajas e vida nuechenca. Cairn es plan toristica e las doas darrièras son un cèntre industrial e militar la primièra e la capitala de l’elevatge estatal la segonda. Val pas dire que, amb un clima tropical subtropical e sec, la biodiversitat es susprenenta.
De gigantas sèlvas tropicalas
A la còsta nòrd la sèlva a coma plantas pus comunas las falguièras, los palmièrs e las lianes. Mai al sud i a bòsques d’eucaliptus e de pin de cana (Araucaria), sitaudas a las montanhas. A la còsta tanben i a mangròvas del còp qu’a l’interior sabanas d’acàcias, sèlvas de Brigalow e encara prats gigants d’èrba de Mitchell, que pòt subreviure amb brica d’aiga.
Un dels autres tresaurs naturals de Queensland, a mai de la flòra, es la siá fauna; los koalas demòran als bòsques d’eucaliptus de l’èst, vesins dels cangorós grises orientals, los walabís de còl ròge e los equidnas e ornitorrincs. Al nòrd i a una espècia plan singulara, un cangoró arboricòl.
Se parlam d’aucèls, cal soslinhar lo perroquet de l’arc de sant martin e tanben lo jabiró. Als flumes del nòrd i a crocodils marins, e gripauds de cana, una espècia envasiva e un problema ecologic de primièr òrdre.
Benlèu amb una fauna tan divèrsa, calguèt crear plusors pargues nacionals per protegir la fauna e la flòra, car los ecosistèmas de Queensland son Patrimòni de l’Umanitat dempuèi fa annadas. Un dels pus famoses es lo Pargue Marin de la Granda Barrièra de Coralh, l’espaci natural pus important de Queensland; mai de 2 300 km de l’ocean parallel a la còsta, amb de centenars d’espècias d’algas marinas e prats de fanerogamas, clau per contrarotlar l’erosion de la mar.
Lo pargue es un fum d’espècias desparièras, dempuèi lo peis palhassa fins al peis cirurgian (i a mai de 1 500 espècias de peissum desparièr), que demòran al costat de mai de 400 espècias de coralh, làmias e balenas o dugongs e tartugas.
Los autres dos pargues mai celèbres son lo Pargue Nacional de Daintree, al nòrd de Cairns, la sèlva tropicala pus anciana de tota la planeta, amb mai de 130 milions d’ans de vida. E lo Pargue Nacional de K’gari. Al primièr las plantas e arbres del luòc son ancestralas coma l’arbre gigant dels Idiòtas, d’ausèls coma lo cauari comun o lo parpalhòl blau Ulisses. Lo segond es la plaja pus longa del mond, amb mai de 120 km de dunas de sable sens fin.
Caracteristicas plan singularas de K’gari son las falguièras gigantas, e los lacs amb d’aiga blosa, com lo lac McKenzie, ont i a una populacion pas pichona de dingos (e que son tanben los pus bloses de tota Austràlia).
Fin finala, cal tanben remembrar lo Pargue Nacional de Carnarvon, situat al sec interior de Queensland, que protegís l’espectacloca gòrja de Carnarvon, amb de falguièras arborescentas, de palmièrs de la gòrja (Livistona nitida) e de forèsts barradas estonantas. L’onitorrinc e lo wallabí de las ròcas ne son emblèmas, a mai de plusors espècias de sèrps.
Per ansin, Queensland és un polit e gigantàs estat australian amb una biodiversitat estonanta. E lo podem gausir en tot visitar la Granda Barrièra de Coralh, la sèlva de Daintree o Brisbane e Gold Coast, segon los interesses. E ara cal pensar al futur, se òm vòl que la beutat de l’estat del Solei contunhe coma un dels grands tresaurs naturals de l’umanitat.
La Redaccion
Imatge principala: JohnGGM/CC
