Dormir mens poiriá èsser fòrça bon per la santat umana, fins al ponch que poiriá ajudar a luchar contra cèrtas malautiás coma la depression. D’efièch, un nòu estudi a confirmat que dormir una ora de mens cada jorn pòt reduire lo risc de patir una depression fins a un 23%.
L’estudi, fach per las celèbras universitats de Colorado Boulder, lo MIT e Harvard, analisèt las donadas geneticas de mai de 840 000 personas e es estat publicat dins lo numeric JAMA Psychiatry. A confirmat que lo cronotipe, çò es lo temps que volèm dormir, pòt plan influenciar lo risc de patir una depression.
“Èra sospechat que dormir èra restacat amb la possiblitat de patir una depression, çò diguèt Celine Vetter, professora de fisiologia. Totun, totes se demandavan quant de temps èra necessari per garir aquela malautiá. Nosautres avèm descobèrt que dormir fins a una ora de mens d’un biais jornadièr pòt fòrça reduire lo risc de patir una depression puèi”.
D’autre caire, ja èra tanben conegut que dormir pauc èra causa dirècta de depression. En 2018, un estudi fach sus 32 000 infirmièras soslinhava que se levar mai d’ora podiá demesir lo risc de desvolopar una depression d’un 27%. Mas quant de temps abans? Una ora abans ? Doas oras ? Pr’amor que dormir mens tanben vòl dire patir una possibla depression.
Ara es estat descobèrt que i a mai de 340 variantas geneticas que determinan cossí dormissèm e quant de temps. Puèi observèron mai de 85 000 personas pendent una setmana per veire cossí e quant dormissián. La mejana trapada foguèt de 7 oras. E dormir mens qu’aquò pòt provocar una depression. Mas dormir una ora de mens o pòt empachar. E vaquí la suspresa: lo risc de desvolopar una depression es mendre, non perque se dormís mens, mas pr’amor de la lutz solara. Dormir mens vòl dire aver mai de lutz del Solelh e doncas èsser mai aürós. “Nòstra societat, çò apondèron los cercaires, es fach per “d’aucèls de matin” e los “aucèls de nuèch” riscan mai de pensar que son en defòra de la societat”. A mai, lo conselh donat per dormir melhor e èsser mai aürós es aqueste: lo jorn clar, la nuèch escura, se levar lèu, anar al trabalh en bicicleta, e doblidar lo telefonet abans d’anar dormir.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
