Lo darrièr estudi paleoantropologic fach sus l’arribada de nòstra espècia, Homo sapiens sapiens, dins l’oèst europèu, a confirmat una primièra preséncia d’aperaquí fa 41 000 ans, çò es 5000 ans abans çò que se cresiá. L’estudi es basat sus d’aisinas de pèira trapadas dins la cauna de Picareiro, en Portugal.
Segon aquel estudi, d’umans modèrnes serián ja arribats dins aquel luènh endrech de l’oèst europèu (pr’amor que los primièrs venguèron en Euròpa a travèrs de l’Euròpa del sud-èst) entre fa 41 000 e 38 000 ans. Foguèt aital que l’antropològ estatsunidenc Jonathan Haws dirigiguèt una còla internacionala per o analisar.
Per ansin, plusors espleches de pèira descobèrts fa gaire dins la cauna portuguesa de Picareiro, situada prèp de la còsta atlantica del centre d’aquel país, aurián confirmat l’arribada de l’òme modèrne dins aquela region europèa fòrça abans çò que se pensava. E se los neandertalians ailà i visquèron benlèu dedins fa 37 000 ans, aquò tanben voldriá dire que las doas espècias demorèron amassa almens pendent 4000 ans.
“La question suls darrièrs neandertalians que visquèron en Euròpa demòra dobèrta, çò diguèt Lukas Field, antropològ de l’Universitat de Boèmia de l’Oèst. Foguèron assimilats o remplaçats? Encara o podèm pas dire. Los espleches de pèira trapats a Picareiro apertenon a la tecnica aurinhaciana e son d’una epòca fòrça anteriora a tot çò qu’aviam trobat dins la region fins ara, çò qu’es estonant”.
Una tecnica plan primitiva
Fins ara, l’evidéncia mai anciana de la preséncia d’umans modèrnes al sud d’Èbre èra la trapada dins la cauna de Bajondillo, situada sus la còsta pus meridionala de la peninsula Iberica. Mas la descobèrta a Picareiro de pèiras talhadas amb la tecnica aurinhaciana (la primièra utilizada per d’umans modèrnes) fa recular la cronologia preïstorica umana d’aperaquí 5000 ans.
“L’espandiment d’umans anatomicament modèrnes en Euròpa fa de milièrs d’ans es essencial per tal de comprene nòstra origina coma espècia sus la planeta, çò afirmèt John Yellen, arqueològ de la Fondacion Nacionala de la Sciéncia. Es per aquò que la descobèrta de Picareiro porgís de contactes entre aqueles òmes e femnas e de neandertalians pendent de milièrs d’ans, pr’amor que la preséncia umana mai anciana en aquel endrech a almens 50 000 ans”.
Las nòvas donadas de Picareiro foguèron confirmadas amb una analisi scientifica sonada radiocarbòni. Segon çò que semblariá, pasmens, los neandertalians del luòc recebèron pas brica l’influéncia dels umans modèrnes, car lors aisinas de pèira contunhèron d’èsser bastidas amb la tecnica de Levallois, fòrça mai primitiva. E lo material per los bastir tanben foguèt desparièr.
En mai d’aquò, la nòva tròba ajudarà a melhor interpretar lo clima de l’epòca, car los cercaires poguèron analisar la fanga d’aquela cauna e conéisser aquel paleoclima. “L’arribada dels umans modèrnes se debanèt justament quand lo freg venguèt mai dur, çò confirmèt Michael Benedetti, de l’Universitat de Carolina del Nòrd.“ L’estudi es publicat dins la revista numerica Proceedings of the National Academy of Sciences.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
