Cal pas se demandar gaire qu’es aquò que fa l’umanitat per contaminar l’environament de la manièra grèva qu’o fa. Se la majoritat de nosautres podèm pensar que lançar d’aiga radioactiva a l’ocean es òrre pel clima e la santat de l’environament de la planeta, lo govèrn del Japon pensa qu’es pas aital, e ara o vòl far amb d’aiga radioactiva de la central Fukushisma.
La causa ne seriá d’aiga radioactiva que demòra encara a la centrala nucleara de Fukushima, que patiguèt un grèu accident nuclear en l’an 2011. Segon las autoritats japonesas l’aiga contaminada que i a dins aquela centrala nucleara, ara destrusida, “pòt pas pus demorar dins la centrala, pr’amor que n’i a de mai en mai e d’aperaquí l’an 2022 i aurà pas mai d’espaci. Pr’aquò que cal la lançar a l’ocean”.
La decision arribèt aprés d’annadas de discussions scientifica, politica e sociala mas plusors grops ecologistas e environamentalistats confirmèron, malgrat la posicion governamentala, que i son totalament contraris e ja anoncièron que contunharàn la lucha per o arrestar. Benlèu, pr’amor d’aquò, lo govèrn del Japon diguèt que la decision encara non èra finala e que las causas encara podián cambiar.
Un atemptat contra l’environament
Segon aquels grops contraris al lançament d’aiga radioactiva de Fukushima a l’ocean, serián lançats divèrses milions de tonas al Pacific e l’operacion començariá en 2022. Aquelas donadas foguèron confirmadas pels jornals mai legits de Japon, coma lo Yomiuri Shimbun.
La decision d’aquò far arribariá, segon soslinhèron los mèdia japoneses, pr’amor qu’espurar aquela aiga dins la pròpria Fukushisma poiriá demorar fins a 30 annadas. E aquò es çò que lo govèrn e los scientifics governamentals vòlon pas. Seriá plan lèu de la getar a la mar. En mai d’aquò, divèrses jornals japoneses tanben anoncièron que la decision finala, totun, poiriá venir pendent la fin d’octobre.
Segon mai d’un scientific governamental “ i a cèrta urgéncia per getar tota aquela aiga dins l’ocean, pr’amor que i a pas pus d’espaci dins Fukushisma e tanben i a d’aiga de pluèja que fa pus malaisit lo problèma. E aquò s’es debanat pendent d’annadas, fins a uèi lo jorn”.
Pasmens, la majoritat dels isotòps que i aviá dins aquela aiga ja foguèron levats. Mas semblariá èsser que i a un tipe d’isotòp, lo triti, que pòt pas èsser levat de l’aiga, e entraïna encara de radioactivitat a la meteissa. La setmana passada, lo ministre d’Indústria del Japon, Hiroshi Kajiyama, confirmèt que lo govèrn encara o deviá pensar plan, mas que caliá prene una decision lèu lèu.
E d’ecologistas mas tanben plusors grops de pescaires del país i son contraris. Cal remembrar que Japon es un dels païses de la planeta ont la pesca es pus importanta pr’amor de la dièta de lors abitants. Segon aqueles grops aquò entraïnariá una pèrda economica grèva a la region pr’amor que los japoneses volrián pas pus comprar de peis d’ailà.
D’un autre costat, cal soslinhar que mai d’un cercaire scientific afirmèt que “l’aiga seriá diluïda lèu dins l’ocean e que l’isotòp del triti es gaire dangierós per la santat umana o la fauna de la mar”. Mas los umans avèm totjorn la capacitat racionala de creire o pas las causas, malgrat sián dichas per de scientifics e tanben podèm pensar qu’aquò poiriá venir una vertadièra catastròfa per l’environament de la planeta. E, benlèu, sonque benlèu, far quicòm per o arrestar.
Un article de Christian Andreu*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
