Home GEOGRAFIA L’HOBBIT ES PAS L’ANCESSOR DELS PIGMÈUS DE FLORES
L’HOBBIT ES PAS L’ANCESSOR DELS PIGMÈUS DE FLORES
0

L’HOBBIT ES PAS L’ANCESSOR DELS PIGMÈUS DE FLORES

0

Quand foguèt trobat l’esqueleta fossila d’Homo floresiensis en 2004, la comunautat scientifica considerèt lèu que los pigmèus, qu’encara uèi demòran prèp de la cauna ont foguèt descobèrta, avián l’espècia de l’Hobbit coma ancessor. Se pensava qu’aquò èra normal pr’amor de las talhas. Ara una còla de geneticians a fach un estudi per restacar las doas populacions, los pigmèus e los hobbits. Mas an mal capitat. Los pigmèus de Flores d’ara an evolucionat de manièra desparièra e independenta.

Aquò foguèt una suspresa. Los abitants de l’illa indonesiana de Flores son estats fins fa gaire de pigmèus. E o son totjorn estats. La cresença scientifica qu’aquela populacion aviá Homo floresiensis coma ancessor es ara demostrada coma marrida. Es çò qu’an descobèrt una còla de cercaires de l’Universitat de Princeton.

IFins ara se pensava que los pigmèus de Flores avián coma ancessor l’Hobbit, descobèrt en 2004.

“Totes avèm de gèns neandertalians –çò diguèt la cercaira Serme Tucci– . Qualques umans modèrnes, de mai, avèm de gèns tanben transmeses pels denisovans mas es pas lo cas d’Homo floresiensis. Podèm pas encara restacar associar aquela espècia amb d’autras. E çò de segur es que foguèt pas l’ancessor dels pigmèus actuals de l’illa de Flores”.

Una mòstra genetica de 32 pigmèus

Per assajar de ligar la populacion pigmèa d’uèi lo jorn amb Homo floresiensis, los cercaires analisèron l’ADN de 32 pigmèus actuals d’aquela illa e estudièron las variacions geneticas qu’avián patit.

Homo floresiensis èra encara fòrça mai pichon que los pigmèus actuals de l’illa de Flores.

La resulta foguèt estonanta. L’istòria genetica dels pigmèus de Flores a coma ancessors doas espècias: de neandertalians e de denisovans; mas i a pas cap d’evidéncia de gèns d’autres ominids modèrnes d’autres luòcs de la planeta. “An fòrça gèns neandertalians –çò diguèt Tucci– e un pauc de gèns denisovans. Esperàvem de trobar qualque ondada migratòria d’Oceania fins a Flores mas l’avèm pas pogut rescontrar”.

La soleta causa qu’aquesta còla scientifica a pogut trobar dins la populacion actuala de pigmèus de Flores es una associacion dirècta entre la dièta d’aquestes e lor talha. A mai, los cercaires confirmèron qu’Homo floresiensis foguèt fòrça mai pichon que los pigmèus d’uèi. Atal, l’Hobbit mesurava solament 106 cm en mejana e los pigmèus actuals 145 cm. Çò que vòl dire que, fa gaire, i aguèt un crosament amb una autra espècia d’ominids pas encara descobèrta.

“Es normal dins aquel tipe d’illas –çò diguèt Tucci–. Los animals grands apichonisson e los pichons creisson. D’efièch, Homo floresiensis visquèt amb d’elefants nans, de dragons de Komodo, de rats e d’aucèls gigants. Aquel ominid, totun, apichoniguèt a causa de sa dièta après arribar dins lo nòu abitat”. L’estudi es estat publicat dins la revista numerica Science.

La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.

LEAVE YOUR COMMENT

L'adreça electrònica no es publicarà. Els camps necessaris estan marcats amb *