Se pensava que la momificacion de cadavres èra pas tant anciana en Egipte. Mas la confirmacion d’una momia preïstorica farà cambiar la compreneson d’aquel procés egipcian: d’efièch, ara una còla a demostrat que comencèt, almens, l’an 3700 abans lo Crist. E que seriá estada desvolopada dins una region, la Nauta Egipte, qu’aviá balhat fins ara cap de momia tant anciana.
La confirmacion de l’edat d’aquela momia (situada al Musèu Egipcian de Turin dempuèi l’an 1901), facha amb lo meteis metòde utilizat puèi pendent l’epòca de l’Egipte Classica, situa lo començament de la momificacion egipciana 1500 ans abans çò que se cresiá. La descobèrta arriba aprèp l’analisi de la momia amb de nòus metòdes scientifics.
Un procès natural
Atal, una còla internacionala de las universitats de York, Macquarie, Oxford, Warwick, Trent e Turin, a descobèrt d’evidéncias scientificas d’un procès de momificacion egipcian fach amb d’òlis de divèrsas plantas, de resina de conifèr calfada, un extrach de plantas aromaticas e de sucre. Amb tot aquò foguèron pintats los teissuts que i aviá a l’entorn del còrs egipcian.
A mai, es estada confirmada l’origina d’aquela momia: la Nauta Egipte, çò es la partida mai meridionala del país. Aquò fa pensar que la momificacion èra utilizada fòrça abans e dins de regions egipcianas encara uèi non confirmadas.
“La recèpta de momificacion confirma d’autras recèrcas entamenadas fa de temps dins de luòcs egipcians preïstorics –çò diguèt Stephen Buckley, arqueològ d’aquela còla–. Ara podèm dire, solide, que foguèt un procés fòrça mai espandit dins lo temps e l’espaci egipcians que çò que se pensava”.
D’efièch, los productes utilizats per momificar aquel cors avián de proprietats antibacterianas que tanben foguèron utilizadas amb las meteissas proporcions mai tard en Egipte, pendent l’Ancian e lo Mejan Empèris. Vesèm ara qu’aquel biais de momificacion foguèt una de las colomnas basicas de l’anciana cultura d’Egipte”, çò contunhèt Buckley.
Segon l’arqueològa Jana Jones, d’aquela còla, l’analisi d’aquela momia, amb un estudi quimic mas tanben genetic e microscopic dels teissuts que portava aquela momia situada dins un musèu italian pendent mai de 100 ans, a fach desplaçar ara lo començament d’aquel procès fins a l’an 3600 abans lo Crist, çò es lo temps de la mòrt del jovent òme de 20 ans momificat.
“I a fòrça paucas momias d’aquel periòde que pòdon èsser analisadas – çò diguèt Tom Higham, scientific d’Oxford– pr’amor qu’abans se pensava qu’èran estadas momificadas de manièra naturala. Ara, l’analisi facha amb de radiocarbòni pòt situar lo començament d’aquel procès dins una fasa fòrça mai anciana de [la cultura de] Naqada, pendent la preïstòria egipciana e 1500 ans abans que çò que se pensava, e aquò cambiarà totalament nòstra vision del passat d’aquela civilizacion, e fòrça”.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
