Home SCIÉNCIA ES IDENTIFICAT UN NÒU GROP DE VIRUS GIGANTS
ES IDENTIFICAT UN NÒU GROP DE VIRUS GIGANTS

ES IDENTIFICAT UN NÒU GROP DE VIRUS GIGANTS

0
0

De cercaires austriacs e estatsunidencs an identificat un grop de virus gigants apelats clausneovirus. Segon la còla scientifica qu’a publicat l’estudi, an de caracteristicas nòvas pr’amor qu’an evolucionat fa gaire. Entre aquestas, i a de composants d’autres virus mas tanben de proteïnas determinadas.

Amb aquesta trobalha, la coneissença dels desparièrs tipes de virus presents sus la Tèrra e de lor evolucion es encara mai perfiècha.

Aquò arriba après la descobèrta en 2003 d’un autre grop de virus mai pichons, los minivirus. Dempuèi alavetz d’autres virus gigants son estats trobats: los pandoravirus e los pitovirus. Aquò cridèt l’atencion dels scientifics per estudiar encara mai los desparièrs tipes de virus. E an sorgit doas ipotèsis.

Los virus gigants an evolucionat d’ancianas cellulas uèi ja escantidas. O son l’evolucion de virus mai pichons. E la recenta descobèrta realizada per aquela còla de geneticians situariá los clausneovirus en aquela direccion. Aital o afirma Tanja Woyke, cap del Programa Genetic Microbian de l’Institut Energy Joint Genome. “En aqueste scenari de pichons virus infectarián d’òstes eucariòtas e aurián pres divèrsas caracteristicas d’aquestes pendent un long periòde de temps – çò diguèt Woyke”.

La descobèrta d’aqueste tipe de virus, totun, seriá estada facha en Àustria. En tot analisar d’aiga qu’aviá d’èsser reciclada dins la vila de Klosterneuburg, aurián trobat e identificat los virus gigants. Per los detectar, la còla scientifica qu’a fach l’estudi auriá analisat mai de 7000 metagenòmas de l’environament.

De virus pas jamai vistes abans

Las talhas dels clausneovirus son entre 0,86 MB e 1,33 Mb, mas tanben pòdon arribar a 1,53 Mb, segon çò qu’an confirmat los scientifics. La primièra origina qu’avián los gèns cellulars dels virus gigants semblava d’èsser comuna mas après far un estudi mai prigond, an descobèrt que venián de desparièrs òstes. Puèi, los scientifics an bastit divèrses modèls evolutius dels virus gigants e an trobat qu’èran arribats a lor forma finala tròç per tròç, pauc a cha pauc pendent lor evolucion.

“Los clausneovirus an d’enzims d’acid ribonucleic transferit en mai de 19 de lors 20 aminoacids. Aquò –çò an assolidat los scientifics– e divèrses autres factors son una descobèrta jamai vista abans dins lo mond dels virus”.

Los clausneovirus an de caracteristicas nòvas pr’amor qu’an evolucionat fa gaire.

La còla qu’a realizat l’estudi, publicat dins la revista Science, tanben a confirmat qu’aqueles nòus virus son de la familha de virus nomenada Mimiviridae. E aurián un grand impacte suls protistas qu’ajudan a regular los cicles biogeoquimics de la planeta.

“Amb aquesta trobalha, la coneissença dels desparièrs tipes de virus presents sus la Tèrra e de lor evolucion es encara mai perfiècha –çò diguèt Eugene Koonin, biologista del Centre Nacional de Biotecnologia estatunidenc e tanben cap de l’estudi–. La sintèsi de las proteïnas es un dels procèsses mai importants en la vida cellulara e aquestes virus son fòrça mai pròches de las cellulas que cap d’autre virus o es pas jamai estat”.

La Redaccion

Aqueste article serà tanben publicat dins Jornalet , lo primièr quotidian en linha de lenga occitana, amb lo qual Sapiéncia a un acòrdi de cooperacion.

LEAVE YOUR COMMENT

L'adreça electrònica no es publicarà. Els camps necessaris estan marcats amb *