Açò ei çò que defensen ua còla cercaires dera Universitat australiana de Queensland. Aumens, teoricaments, pr’amor que non siguec hèta cap pròva en laboratòri. A mès, diden qu’ei possible d’ac hèr se non se creen paradòxes temporaus. En aguesta teoria es cercaires expliquen com se poirie hèr e com ac demòstren es matematiques.
“Era fisica classica afirme que se sabem er estat d’un sistèma durant un moment dat ne podem dedusir tota era sua istòria, çò diguec Germain Tobar, dera Escòla de Matematiques e Fisica de Queensland. Açò ajudarie a enviar coets a d’autes planetes e saber tostemps on son”.
Totun, era teoria dera relativitat confirme que i poirien auer problèmes se viatjam en temps. E encara non i a cap teoria qu’amasse ambedues teories, era dera relativitat e era dera fisica tradicionau. Era sciéncia actuau afirme qu’ambedues teories non pòden existir ath còp. Mès açò ei çò qu’an ensajat de hèr es cercaires d’aquera còla.
Se pòt viatjar en temps ?
Germain Tobar e eth sòn collèga Fabio Costa , deth Centre Quantic d’aquera universitat, trapèren un sistèma entà unir es dues teories a trauès des matematiques. E era resulta deth sòn trabalh qu’ei susprenenta. “Se podem enviar quauqu’un entath passat entà evitar qu’eth pacient zèro auesse era COVID-19 eliminariem eth motiu entà enviar quauqu’un enta’c evitar, çò diguec Costa. Açò qu’ei ua paradòxa temporau e serie era causa mès grana entà arrestar aqueth viatge”.
Atau, diuèrsi cercaires diden qu’açò serie possible mès afectarie era nòsta capacitat de decision finau, pr’amor que non se poirie acceptar logicaments. Era conclusion finau ei que òc, se pòt viatjar en temps, mès que non se pòt hèr arren entà provocar ua paradòxa temporau pr’amor qu’açò afectarie er viatge iniciau. Er estudi siguec publicat ena revista online Classical and Quantum Gravity.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
