Fa dètz ans nos daissèt una de las personas que mai faguèt per intensificar las relacions entre Catalonha e Occitània, Enric Garriga Trullols. La siá vida foguèt consacrada a la defensa de la lenga, la cultura e l’identitat d’ambedoas nacions, dempuèi posicions totalament sobeiranistas e independentistas, e amb l’idèia de la collaboracion constanta entre catalans e occitans, coma una tendéncia naturala que totjorn s’auriá d’aver mantenguda, e qu’en qualqu’unas escasenças s’aviá pas pogut aténher per las vicissituds istoricas d’ambedós pòbles.
Resumir totas las activitats realizadas per Enric Garriga en un sol article es una tòca impossibla. Aviá totjorn d’energia per contunhar. Mas devèm mencionar doas entitats fondadas per el (amb d’autras destacadas personalitats) qu’an mantengut aquel esperit.
L’IPECC e lo CAOC
L’Institut de Projeccion Exteriora de la Cultura Catalana (IPECC) dempuèi l’an 1978, a difonduda la cultura catalana pels cinc continents, amb de contactes amb entitats catalanas situadas a l’estrangièr, en organizant d’activitats de difusion de la lenga e la cultura catalanas, e amb lo bastiment de monuments a personalitats tanben a divèrses païses del mond. Cada an, l’IPECC autreja los Prèmis Josep Maria Batista i Roca, consacrats a de personalitats o d’entitats qu’ajudan a aquela difusion de Catalonha arreu del mond.
Lo Cercle d’Afrairament Occitanocatalan (CAOC) se consacra a promòure las relacions entre Catalonha e Occitània dempuèi l’an 1978, e impartís de corses de Lenga Occitana e organiza d’activitats culturalas per conéisser e difondre la rica e variada cultura occitana a Catalonha. Cada an lo CAOC organiza la “Pujada a Salau”, ont a començaments d’Agost, catalans e occitans nos trobam a aquela montanha situada a la frontièra entre ambedós païses.
Un dels projèctes ont Enric Garriga intervenguèt mai activament foguèt en l’elaboracion de la Lei Catalana de l’Occitan de l’an 2010, amb l’objectiu de desvolopar l’article 6.5 de l’Estatut d’Autonomia de Catalonha, que declara la lenga occitana coma oficiala a tot lo territòri catalan. 
E un autre dels projèctes que venguèt un succès e ont participèt tanben a la siá organizacion foguèt la celebracion de l’EUROCONGRÈS 2000, un fòrum d’amassada de divèrses territòris europèus del nomenat “euro-espaci latin”, amb de conferéncias e debats sul passat, lo present e lo futur de totes eles, amb la tòca d’establir de relacions e collaboracions contunhas en totes los domenis.
L’escrivan d’aquel article coneguèt personalament Enric Garriga e pòt assegurar qu’èra totjorn un plaser poder conversar amb el. Tot un cavalièr. Ongan s’a commemorat lo desen anniversari de la siá mòrt e son estadas organizadas divèrsas activitats a Barcelona per remembrar la siá òbra, qu’a pas d’èsser jamai desbrembada e que totes devèm contunhar.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
