Li calguèt fugir de China per cercar una proteccion car sa vida èra en perilh. Ara, totun, la virològa chinesa , es amagada als Estats Units. Sonque après confirmar que sa vida corriá pas pus de risc diguèt perqué aviá fugit de China e poguèt afortir quala èra segon ela l’origina de la covid-19: son virus seriá estat creat dins un laboratòri militar governamental chinés e son origina seriá pas Wuhan. E tot aquò o sabiá ja en 2019 mas lo govèrn chinés li aviá pas demandat de ne parlar pas se voliá demorar viva.
Segon la scientifica chinesa, “lo virus a pas per origina la natura ni mai lo mercat de Wuhan. E lo govèrn chinés, cò apondèt Li-Men Yan, coneissiá ja qual èra lo dangièr del SARS-CoV-2 abans de ne parlar amb l’OMS lo 31 de desembre de 2019”.
La virològa chinesa comencèt de far de recèrca scientifica a Hong-Kong pendent aquel mes e ailà se poguèt avisar qu’èra ja sauput que lo virus, que puèi seriá conegut sus tota la planeta coma lo de la covid-19, èra un nòu tipe de virus SARS e que ja èra estat totalament sequenciat son genòma. Totas aquelas donadas li foguèron alara confirmadas pel Centre de Contraròtle e Prevencion de las Malautiás de China.
Après conversar amb d’autres cercaires que comprenián pas perqué China voliá pas donar d’informacion al Mond sus la covid-19, comencèt de pensar que benlèu lo govèrn de China voliá amagar la vertadièra origina d’aquel virus. Foguèt alavetz que foguèt menaçada e patiguèt fòrça per son integritat fisica. E decidiguèt de fugir de China e cercar d’ajuda a l’estrange.
“Lo mercat de Wuhan foguèt pas, de cap biais, l’origina vertadièra de la covid-19, çò afirmèt Li-Men Yan. L’origina tanpauc ne foguèt pas brica un animal, coma ditz lo govèrn chinés. China volguèt pas balhar d’informacion sus lo nòu virus e i a de pròvas que son estadas confirmadas per l’FBI . E la quita OMS m’avertiguèt de dire pas la vertat se voliá servar la vida. Es per aquò que cerquèri refugi als Estats Units. Mas ara pòdi dire quala es la vertat sus l’origina d’aquel virus”.
China desmentís totas las acusacions
Es pas lo primièr còp que lo govèrn chinés es acusat d’aver creat lo virus, e cal dire qu’o a totjorn refusat. De fach, segon un estudi publicat dins Nature Microbiology, lo coronavirus que genèra la covid-19 se tròba dins las ratapenadas dempuèi mai de 40 ans, o benlèu 70. A mai, l’estudi assegura que lo virus pòt pas venir d’un laboratòri “pr’amor que deurián existir d’evidéncias d’aquela alteracion genetica que se son pas pogudas observar. A mai, veson extrèmament improbable qu’un virus se pòsca escapar d’un laboratòri.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
