UN NÒU TEROPÒDE ARGENTIN
Los scientifics Philip Currie, de l’Universitat d’Alberta, Canadà, e Rodolfo Coria, del Conselh de Recèrcas Scientificas e Tecnicas de l’Argentina an anonciat la descobèrta d’una nòva espècia de teropòde o dinosaure carnivòr, Murusraptor barrosaensis. Segon aquestes dos scientifics, aqueste dinosaure auriá viscut fa 87 milions d’annadas, dins la region de la Patagonia argentina.
Aital, aqueste teropòde, tèrme scientific fòrça precís que senhala totes aqueles dinosaures que marchavan amb dos pès e qu’èran carnivòrs, auriá viscut pendent lo Cretacèu, la primièra de las tres epòcas ont i aguèron dinosaures sus la Tèrra.
Murusraptor doncas aperten a la familha dels Megaraptoridae, un nom que compren totes los dinosaures predators de mesuras mejanas e qu’avián arpas mai que longas (ipertrofiadas). De mai, tanben avián los òsses plens d’aire, çò que los fasiá unes animals fòrça leugièrs e rapids.
L’especimèn trobat per aquestes scientifics sembla que seriá un animal encara jove e aquò volriá dire qu’aquesta nòva espècia èra mai granda que d’autras coma Megaraptor e tanben qu’auriá las mesuras d’Aeroston e Orkoraptor. Aqueste especimèn es estat trobat a la Sierra Barrosa, unas montanhas plaçadas al nòrd-oèst de la Patagonia argentina.
Una familha fòrça misteriosa de dinosaures
“L’especimèn qu’avèm trobat aperten a una familha de grands dinosaures qu’es fòrça misteriosa – çò confirmèt Philip Currie – . Es un animal que fasiá mai de 8 mètres de long quand viviá e coma especimèn es estat trobat en d’excellentas condicions arqueologicas. L’escasença de trobar l’esqueleta gaireben completa ajuda e fòrça a establir la relacion que podiá aver agut amb d’autras espècias de dinosaures”.
La trobalha, qu’es estada publicada a la revista scientifica PLos ONE, tanben confirma que l’especimèn de Mususraptor trobat ofrissiá una caissa del cervèl totalament sencera e aquò es un fach fòrça inabitual. Lo meteis professor Currie auriá doncas explicat qu’aqueste seriá un cas unic de caissa de cervèl trobada en bonas condicions d’un megaraptor en tota la istòria de la paleontologia.
E maugrat que la informacion qu’an pogut amassar los scientifics non es encara completa las bonas condicions de la majoritat dels òsses de l’esqueleta de Murusraptor barroensis trobats an pogut balhar fòrça informacion sus l’anatomia de los megaraptors. Aquesta nòva espècia de terapòde auriá una cara fòrça especiala e plan desparièra de la d’autres megaraptorides, un fach tanben confirmat per Rodolfo Coria.
“L’analisi filogenetica non poguèt determinar las relacions evolutivas de Murusraptor, mas los fossils trobats an balhat fòrça informacion anatomica sus la familha de los megaraptors – çò diguèt Rodolfo Coria -. Ara la comunautat scientifica poiriá discutir melhor se los megaraptors èran de teropòdes qu’apertenián a la familha dels alosaurides o dels coelurosaurides, un fach qu’es encara en discussion uèi lo jorn”.
Christian Andreu
