Un nòu calcul establís que i a sièis miliards de planetas coma la Tèrra sonque dins nòstra galaxia
Segon de donadas recentas d’un nòu estudi, i auriá una planeta coma la Tèrra per cada cinc estelas coma lo Solelh. L’estudi foguèt realizat per de cercaires de l’Universitat de la Colómbia Britanica amb de donadas de la mission Kepler de la NASA.
Per qu’una exoplaneta siá considerada coma la Tèrra, i cal poder trapar de ròca e es necite que son orbita a l’entorn d’una estela coma lo Solelh siá dins l’airal ont la vida es possibla. En mai d’aquò, i deu aver l’escasença que sus la planeta i aja d’aiga e potencialament de vida.
“I auriá fins a 0,18 planeta coma la Tèrra per cada estela del tipe G, çò diguèt la cercaira de l’Universitat de la Colómbia Britanica Michelle Kunimoto. Aquò pòt fòrça ajudar a la recèrca d’encara mai d’exoplanetas“.
D’autre caire, l’astronòm de la meteissa universitat, Jaymie Matthews, confirmèt que la Via Lactèa conteniá fins a 400 miliards d’estelas e que mai d’un 7% d’aquestas èran del tipe G. “Aquò vòl dire, çò apondèt Matthews, que i a almens sièis miliards d’exoplanetas dins nòstra galaxia”.
Fins ara, i aviá sonque de donadas qu’afirmavan que se comptava un 0,02% d’exoplaneta per cada estela coma lo Solelh. Los cercaires soslinhèron que çò d’abitual èra de considerar que i a mens d’exoplanetas pr’amor de lor talha. E aquò vòl dire que i a fòrça mens exoplanetas trapats al torn d’aquel tipe d’estelas. Mas Kunimoto utilizèt una nòva tecnica per los trapar.
En tot utilizar d’algorismes
“Comencèri de classar las possiblas exoplanetas segon s’èran estadas trapadas o non. Aquò ajudèt a ne trapar mai, çò afirmèt Kunimoto. Après, restaquèri aquelas planetas amb lo catalòg actual de las planetas semblablas a la Tèrra trobadas fins a uèi lo jorn. Se las donadas èran parièras, se podiá plan creire que i aviá encara realament fòrça mai d’exoplanetas que çò que cresèm.”
Abans de far aquò, Kunimoto aviá ja estudiadas las donadas de mai de 200 000 estelas de la mission Kepler de la NASA. La cercaira descobriguèt fins a 17 planetas situadas en fòra del Sistèma Solar (o exoplanetas) qu’ara son dins aquela nòva lista. La descobèrta es estada publicada dins la revista numerica The Astronomical Journal.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
