La liberacion deu vibre qu’ei estada aprovada en Anglatèrra. Los vibres que seràn liberats a la natura après que lo governament apròve la lor reïntroduccion. La decision que segueish d’annadas d’ensais e que veirà los vibres har un retorn oficiau en lacs e fluvis anglés.
Los vibres qu’estón caçats dinc a l’extincion en Grana Bretanha quate cents ans a, mes qu’an hèit un certan retorn pendent las duas darrèras decadas. Totun, qualcunes paisans que son inquièts pr’amor que, shens ua gestion corrècta, poirén aver impactes negatius dens la produccion alimentària.
Que’s cred qu’uei dejà i a, haut o baish, cinc cents vibres en Anglatèrra, qualcunes sauvatjes e deus autes barrats per l’òmi. Que n’i a hòrt mei en Escòcia, on las liberacions sauvatjas son dejà permetudas. Entaus conservacionistas, los vibres que son engenhaires de l’ecosistèma, pr’amor que redessenhan lo paisatge on viven. Los barratges que basteishen que ralenteishen lo corrent deus fluvis e arrius e crean d’abitats on d’autas creaturas pòden tornar. Tanben an redusit las inondacions on n’i a.
“Qu’ei un moment passionant, un vertadèr punt de referéncia entà la recuperacion de la natura anglesa” çò ditz Tony Juniper, cap de Natural England. Que tornam un animau desaparegut absent hè sègles, e un animau que sabem que portarà beneficis gigants entà la rèsta de la vita sauvatja, esgotada dejà a la màger part d’Anglatèrra”.
Los vibres que seràn liberats per un sistèma de licéncias supervisat per Natural England. Que cau har donc plans a long tèrmi si’s vòu evitar impactes sus l’agricultura, la produccion alimentària e las infrastructuras.
Entau Sindicat Nacionau deus Paisans, açò qu’ei vitau. Tanben vòlen poder tuar lo vibre se aqueth ei perturbator. Entà David Exwood, vicepresident deu NFU, se los vibres balhan de beneficis, tanben son inquièts pr’amor que i pòden aver d’impactes negatius sus tèrras agricòlas productivas localas. « Los vibres, que pòden inondar e envadir los camps, se neurir de las culturas agricòlas, coma lo blat de moro, e tanben domatjar e tombar d’arbos, dit Exwood. »
Tony Juniper, president de Natural England, ditz que la liberacion deus vibres serà pas aprovada se daubuas condicions son pas respectadas. A Devon qu’ei on los prumèrs vibres seràn liberats, dejà i avèva vibres ací mei d’ua decada a. Adara, que son estats autorizats a demorar au fluvi Otter, dab lo lor impacte suu paisatge e la faiçon qu’interageishen dab las tèrras agricòlas locaus susvelhadas de près.
Un paisatge navèth pr’amor deus vibres
“Tota aquera aiga obèrta qu’ei pr’amor deus vibres, çò ditz Peter Burgess de Devon Wildlife Trust. “Que vòlen l’aiga pr’amor que’us hè sentir segurs. Aquò que vòu díser que pòden tanben transportar lo lor minjar.” Entà Burgess, los vibres qu’an creat zònas umidas que tanben arcuelhen espècias coma las aigretas granas blancas o los martins. Lo nombre de libellulas que creishó, e tanben lo nombre de graulhas e grapauds. Mes pas tots son d’acòrd dab la tornada deus vibres.
Clinton Devon Estates, que gereish divèrsas bòrdas al territòri. Que sostienen lo retorn deus vibres mes tanben pensan suu lo lor impacte environamentau locau. “Daubuas tèrras agricòlas que son vengudas inondadas, çò afirmèren. Qu’avem vist los arbos de paisans dens los lors jardins talhats, çò que vòu díser que l’impacte negatiu a nivèu locau tanben ei reau ».
Uei a Escòcia i a dejà mei de 1.500 vibres. Dens daubuns airals los vibres que s’i escadón plan e que’us caló desplaçar o tuar. Pr’amor que n’i avèva tròp. Entà Roisin Campbell-Palmer, deu Beaver Trust, un mascle e ua hemna qu’èran estats miats a lòcs de conflicte” en Escòcia e qu’èran adara a har un tribalh deus contròles medicaus abans d’estar desplaçats cap au sud. Nosauts, despuish Sapiéncia occitana, qu’esperam que los beneficis environamentaus seràn màgers que l’impacte negatiu locau e que lèu l’espècia i poiré demorar, amassa dab los umans, com ei estat hèit pendent los darrèrs 100.000 ans.
La Redaccion
Fotografia principau: USFWS Mountain Prairie/CC.
Aquesta cronica suu Ràdio País : https://soundcloud.com/radio-pais/natura-lo-vibre-quei-reintroduit-en-anglaterra?in=radio-pais/sets/natura
