UN NÒU BIAIS DE PROFECHAR DE L’ENERGIA SOLARA
La recèrca per produire d’energia amb lo Solelh coma font a fach un bèl pas endavant. Una còla scientifica a pogut, fin finala, utilizar lo meteis sistèma emplegat dins la fotosintèsi vegetala e crear d’idrogèn e d’oxigèn a partir de l’aiga amb d’energia solara. La resulta venguèt après o demostrar dins un laboratòri a travèrs de la creacion de fotosintèsi semiartificiala.
Totes sabon que la fotosintèsi es aquel procès utilizat per las plantas per crear d’energia de la lutz solara. Es produch d’oxigèn quand la molecula d’aiga es devesida. Es una sorsa d’energia fondamentala per la planeta pr’amor de la creacion d’oxigèn. A mai, tanben se produtz d’idrogèn.
Tot aquò arriba après qu’una còla de cercaires de l’Universitat de Cambridge utilizèt un procès nomenat “fotosintèsi semiartificala” per produire d’energia amb de lutz solara coma font. Aital poguèron convertir d’aiga en idrogèn e oxigèn en tot utilizar una mescla de tecnologia biologica e umana.
Aquò poiriá èsser benlèu una vertadièra revolucion dins lo camp de la produccion d’energias renovelablas perque la soleta font utilizada foguèt la lutz solara e lo procès semblable a l’utilizat per las plantas dins la fotosintèsi. De mai, amb aquel metòde los cercaires poguèron produire mai d’energia encara que la producha durant la fotosintèsi de las plantas.
Un procès melhorat
“La fotosintèsi es pas eficaça pr’amor qu’es estada desvolopada sonque per ajudar las plantas a subreviure, pas res de mai –çò diguèt Katarzyna Sokol, directora de la còla–. Atal, solament es producha entre l’1 e lo 2% de l’energia totala que se pòt produire, la que n’an de besonh las plantas, mas es solament una pichona part de l’energia que se pòt aver”.
La recèrca d’aquela còla de Cambridge aviá per tòca d’anar delà las limitacions de la fotosintèsi artificiala en tot utilizar d’enzims dins las reaccions quimicas desiradas. E o poguèron far en tot reactivar lo procès de fotosintèsi que i aviá dins cèrtas algas que lo fasián pas pus servir dempuèi de milièrs d’annadas.
“L’idrogenasa es un enzim que contenon aquelas algas e que pòt reduire de protons en idrogèn. Lo procès foguèt desactivat pendent l’evolucion perque èra pas necessari a la subrevivença. Mas avèm pogut tornar activar lo procès e obténer d’energia e d’oxigèn a partir d’aiga”, çò apondèt Sokol.
Ara Sokol e sa còla creson qu’aquel nòu sistèma de creacion d’energia serà un nòu modèl per desvolopar l’utilizacion de l’energia solara. “Es estonant de veire cossí podèm emplegar aquel procès per entraïnar de reaccions qu’existisson pas pus dins la natura –çò soslinhèt Sokol–. Pòt èsser una gigantesca plataforma per lo desvolopament de la tecnologia solara”. D’autres scientifics an ja confirmat qu’aquela tròba arriba après un grand esfòrç scientific en tot voler profechar d’un procès natural per desvolopar de nòus sistèmas futurs de creacion d’energia solara.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
