UN BISTÈC QU’ES PAS FACH DE CARN
Ja fasiá de temps que los scientifics fasián de provaments al laboratòri e se prevesiá, tanben fa d’annadas, qu’aquò seriá la dièta futura de l’umanitat. Sens o poder confirmar (encara), de cercaires israelians an inventat, en tot l’estampar en 3-D, un bistèc que ne poiriam dire que sembla fach de carn animala. Mas es pas aital. Es totalament artificial e es plan gostós segon los que ne mangèron.
Lo bistèc, qu’a lo gost de carn e sembla tanben fach de carn, foguèt creat amb una estampadoira 3-D mas a pas per origina cap d’animal viu. Es per aquò que foguèt inventat, pr’amor que i a la volontat de noirir l’umanitat amb de carn creada artificialament e sens origina animala. Lo bistèc es estat creat ongan e los cercaires lo considèran coma una vertadièra reüssida e un grand espèr per l’umanitat.
“Foguèt creat amb una estampadoira 3-D qu’imprimís de cellulas vivas, çò confirmèt Neta Lavon, participant del projècte. Son de cellulas que naisson e creisson dins lo laboratòri. Recebon de nutriments a una cèrta temperatura e, per ansin, la textura e la qualitat del bistèc final son nòvas e revolucionàrias”.
Lo bistèc es l’invencion d’Aleph Farms. Una entrepresa de tecnologia israeliana d’Haifa. Recebèron l’ajuda de Rehovot, un institut israelian de tecnologia. E lo bistèc ara creat es lo darrièr de desenats de provaments scientifics realizats dins aquela entrepresa tecnologica dempuèi d’annadas.
Pasmens, e malgrat l’espèr que lo pòt donar lo fach de crear un bistèc aital, se pòt pas esperar (encara) de ne trapar al mercat lèu, car son de bistècs qu’an un prètz plan naut. Segon maites cercaires, es la bona tecnologia per o realizar, mas es encara necite de trapar cossí poder crear de carn amb un prètz mai reduch. Si que non, es pas economic per una entrepresa d’o far.
Lo problèma del prètz
Un dels problèmas trapats es la creissença de cellulas vivas al laboratòri. Aquò es pas brica economic de far. E cal reduire, segon totes los expèrts, lo prètz d’aquela estapa per poder encara arribar de comercializar de carn artificiala coma aquel bistèc.
E, cossí que siá, los cercaires devon tanben aver de cellulas vivas originalas de l’animal per poder, après, estampar en 3-D de carn artificiala. La tòca de l’entrepresa es ara de ne poder far mai abans un an, e de ne vendre pertot abans tres ans. Mas ara imprimir un bistèc encara a un prètz de 50 dolars e aquò pòt pas far concurréncia a un bistèc vertadièr, almens al supermercat. Un còp que lo prètz serà parièr, l’entrepresa ganharà fòrça argent, amb una nòva e estonanta tecnologia del futur qu’avèm, ja, dins lo present.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
