Ei ua descobèrta susprenenta pr’amor qu’ua còla de geològs marins trapèc evidéncies d’aigua doça a mès de 800 m de prigondor ena mar dauant des isles Lofoten, en nòrd de Norvègia. Eth fenomèn, totun, non serie estranh, e es scientifics volèren confirmar qu’ei un hèt comun en es oceans dera planeta.
Segontes aqueri scientifics, aguest fenomèn aurie com causa principau era ploja e era nhèu e serie normau ena mar. “Auèm trapat aigua doça que gessie deth hons dera mar, çò diguec Wei Li Hong, cercaire d’aquera còla geologica norvegiana. Es pescaires de Nordland ja auien avisat que se podie trapar aigua doça tan blosa ena mar que podie èster utilizada entà hèr cafè. Açò ei un hèt abituau en Nordbreigrunnen, pròp dera vila de Meloy.
Era exploracion maritima
Mès que calie explorar aqueres aigues entà saber s’àcò ère vertat o non. E pr’açò era còla de geològs e Wei Li Hong envièren un veicúl contrarotlat de manèra remòta ath hons dera mar en 2017 entà descobrir s’açò ère possible. E se passèc que òc, qu’ère un fenomèn reau.
Segontes aqueri scientifics aguest fenomèn comencèc pendent era darrèra edat de glaç mondiau. Eth glaç entrèc d’ua manèra tan prigonda ena Tèrra qu’entrèc ua grana quantitat d’aigua doça en eth hons dera mar.
“Ei un procés que comencèc hè milions d’annades, quan era aigua doça demorèc jos eth hons marin sense gessuda possible e ara trape ua manèra d’i gèsser lentaments, çò diguec Hong. En Naua Jersei tanben an trapat un aqüifèr com aguest e poirie èster un fenomèn normau en auti lòcs dera planeta”. Er estudi siguec publicat en pagina online Geophysical Research Letters.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
