Après arribar a una situacion tras que critica en 2015, la populacion d’antilòps saiga se reviscolèt d’un biais estonant e ara es en una situacion fòrça melhora. Aital, aquel antilòp de Cazacstan a vist doblar sa populacion dempuèi d’annadas, e segon de nòvas chifras i auriá ara 842 000 individús en luòc dels 334 000 de fa sonque sièis ans.
Un reviscolament intens
D’efièch, la populacion d’aquel antilòp asiatic èra arribada al ponch que los cercaires cresián que poiriá finir lèu-lèu après una granda mortalitat en 2015. Pasmens, divèrsas accions politicas environamentalas realizadas pel govèrn cazac aurián ajudat l’espècia a se remetre d’un biais susprenent. Lo govèrn a fòrça secutat aquestes darrièrs ans lo braconatge, çò qu’a permés la resulta actuala.
Segon d’expèrts, l’antilòp saiga feme dona naissença, en mejana, a fins a dos pichons de manièra annadièra. Aquela fertilitat combinada a l’ajuda governamentala de Cazacstan auriá facultat considerablament lo reviscolament espectaclós d’aquela espècia mamifèra. Pasmens, mantun cercaire tanben soslinhèron que la populacion totala d’aqueles erbivòrs jamai non tornariá èsser coma pendent l’epòca sovietica pr’amor de la modernizacion recenta d’aquel país e sustot de l’actuala esplecha de petròli e de gas.
En 2015, i aviá de regions ont sonque ne demorava aperaquí 1000 individús, mentre qu’abans n’ i aviá 12 000. Divèrsas organizacions ecologistas internacionalas acompanhèron activament la volontat del govèrn cazac de reviscolar l’espècia. Los antilòps foguèron susvelhats per de satellits e tanben per de gardas. Après tot aquel esfòrça, aquela reüssida es un prèmi dels bèls per l’espècia mas tanben pels aimadors de nòstra planeta.
La Redaccion
