Temps de cambiament, temps de reneishement. Era Associacion culturau aranesa Es Paums, era associacion culturau de Vilamòs, ven d’informar que calie – coma mèrquen es sòns estatuts – auer un cambiament ena direccion. Aguest cambiament siguec hèt aguest madeish mes de mai entà hèr renéisher era activitat culturau dera Val d’Aran (e mès enlà encara). E donques bona part des sòns cargues ena Junta Directiua cambièren. Atau, eth nau president des Paums qu’ei José Antonio Castet Villamates, e eth Vicepresident Luis Arias. Cau remembrar qu’Es Paums promò era musica, lengua e cultura araneses des de hè mès de 50 annades e, pr’amor d’açò qu’ei un agent important ena promocion dera lengua e cultura occitanes ena Val d’Aran, mès tanben en Catalonha tota.
Es Paums ja an compausat mès d’ua dotzena d’òbres musicaus en aranés gascon a més de tres curtmetratges (Oxitònia, Net de Huec e Artz Os), e eth CD Oxitònia artenhec eth Prèmi deth Public deth Festivau Joan Verdièr dera cançon Occitana. Ath costat des Paums e des de 1995 i a era Corau Es Paoesses, amiada per Lúcia Mas, ua formación corau tanben de Vilamòs, integraments formada per hèmnes.
Era seccion filologica
Es Paums tanben a ua seccion filologica. Atau, Es Aventures de Tintin, Alicia en País de Meravilhes e diuèrsi tèxtes parlamentaris ne son eth resultat. A mès, son collaboradors abituaus dera revista scientifica Sapiencia Occitana en es sòns articles en aranés. D’auti trabalhs des Paums son es Gòis a Sant Ròc de Vilamòs, damb letra deth poeta Jèp de Montoya (e musica de Jaume Masana Castet).
Fin finau, tanben cau brembar eth CD Es Paoesses canten a Mossen Condó, ua figura literaria celèbra en Aran e que ne siguec celebrat non hè guaire eth centenari deth sòn neishement. D’autes activitats d’aguest grop aranés son amiar eth Grop de Convèrsa dera Universitat de Lhèida entà apréner occitan o encara participar ena creacion deth Diccionari Aranés editat per Istitut d’Estudis Aranesi – Academia Aranesa dera lengua occitana.
Era naua Junta Directiva des Paums qu’ei formada per José Antonio Castet Villamates, president, Neus Castet Ballespí, secretària, Luis Arias Caparrós e Jèp de Montoya, vicepresidents, José Antonio Cobos, tresaurèr, Judith Boria, portavotz, e Rosendo Fernández Castet, Rosa Castet, Eugenio Bobillo e Carmen Martínez, vocaus. Ua naua estapa entà promòir era lengua e cultura occitanes que segur que tanben serà ua capitada. Atau ei eth desir dera còla d’aguesta revista.
Era Redaccion
