Entre los jorns 8 e 11 de Mai de 2025 es estat celebrada la XXIena edicion del RECERCAT, la granda amassada annadièra dels centres d’estudi e recèrca dels territòris de lenga catalana. En aquela escasença, a la vila istorica de Montblanc, capitala de la comarca de la Conca de Barberà.
Organizada per l’Institut Ramon Muntaner, la Federacion d’Atenèus de Catalonha e la Coordinatritz de Centres d’Estudi de Lenga Catalana, la Comuna de Montblanc e lo Centre d’Estudis de la Conca de Barberà, es venguda una escasença unica per conéisser la realitat e la problematica mas tanben los darrièrs trabalhs e d’estudis de las desparièras entitats presentadas pendent aquela edicion, que demòstran la granda qualitat de la recèrca scientifica e la fèrma volontat de manténer los païses de lenga catalana coma protagonistas en la difusion scientifica.
L’AASOC es estada presenta per demostrar la nòstra tòca en la dignificacion de la lenga occitana coma idiòma de recèrca, amb los nòstres libres “Croniques deth sègle XXIau” “Fauna Occitana” e “Fauna Sauvatja ena Val d’Aran” del nòstre director Christian Andreu.
Un concèrt pendent la nuèch
Pendent lo concèrt de la nuèch, Occitània foguèt tanben presenta amb una excellenta interpretacion de l’Imne Occitan, “Se Canta” a la plaça del Convent de Sant Francesc. Justament a l’ancian convent los assistents poguèron visitar doas interessantas exposicions consacradas als bastiments de pèira seca, d’estructuras simbòl d’unas formas de vida tradicionalas qu’apertenon a la nòstra memòria, e a la vida e l’òbra del poèta valencian Vicent Andrés Estellés (l’an passat foguèt lo centenari de la siuena naissença).
Pendent lo liurament dels prèmis RECERCAT, la preséncia valenciana es estada fòrça importanta, entre los premiats amb lo professor d’Istòria Medievala de l’Universitat de Valéncia Manel Pastor e Magdalena, mas tanben amb lo concèrt del cantautor valencian Pau Alabajos e las siuenas versions musicalas dels poèmas de Vicent Andrés Estellés. E una clara solidaritat envèrs las entitats que difondon la cultura e de la recerca a las tèrras valencianas, amb fòrça problèmas. Foguèt tanben premiada l’Associacion Culturala Baixa Segarra per la siuena coneissença e la siuena divulgacion del patrimòni del territòri.
De visitas pel centre medieval de Montblanc, de debats coma lo consacrat al protagonisme de las entitats en la promocion e la conservacion del patrimòni, la presentacion de la segonda edicion del Congrès de Joves Investigadors en Estudis Locals o de la situacion actuala de La Bressola de la Catalonha del Nòrd son una mòstra de la granda diversitat d’actes realizats pendent aquela edicion. E lo pròche an al Pont de Suert, a la Nauta Ribagòrça, mas abans una autra amassada a la vila valenciana de Llíria los jorns 6 e 7 de junh. Fòrça mercés a l’organizacion per tota l’ajuda e fòrça felicitacions per aquela XXIena edicion. L’AASOC Totjorn amb la cultura.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
