QUE I A AIGUA ENA LUA
Segontes es darrères donades scientifiques, siguec demostrat qu’ena Lua i a aigua. Eth sòn estat non serie solament a trauèrs de glaç e tanben n’i aurie enes parts damb Solei deth nòste satellit. Era sua preséncia ja auie estat suspectada hè temps mès adara naues donades qu’arribèren deth telescòpi SOFIA qu’ac confirmèren.
En 2016 mès d’ua nau espaciau auie donat era notícia; ena Lua i auie evidéncia d’aigua en diuèrsi cratèrs en es pòls d’aqueth satellit. A mès, diuèrses molecules d’aigua sigueren trapades ena sua superfícia ja en 2009. Mès es lòcs on i podie auer aigua sonque podien èster trapadi damb era ajuda d’ua tecnica fòrça cara.
Ara, totun, eth telescòpi SOFIA confirmèc eth descorbiment d’aigua pròp deth pòl sud d’aqueth satellit. Era notícia siguec publicada ena revista scientifica online Nature Astronomy e non cau díder qu’ei pro importanta en çò que tanh es viatges a trauèrs der espaci, pr’amor que transportar aigua en es naus espaciaus ei fòrça car. “Ei eth prumèr còp qu’auem trapat aigua d’ua manèra clara ena superfícia dera Lua, çò diguec Casey Honniball, dera NASA. E açò demòstre que i a aigua ena Lua e non solament en es regions damb ombra. I a d’auti lòcs on tanben la poiríem trapar”.
Ua base ena Lua
Eth descorbiment poirie ajudar a convertir lèu era Lua ena prumèra base umana dehòra dera Tèrra pr’amor que i a aigua. Segontes diuèrsi cercaires der espaci eth hèt siguec considerat coma susprenent e fòrça bon. Totun, que non n’i aurie fòrça, pr’amor qu’es cercaires estimèren que dilhèu n’i aurie entre 100 e 400 parts per cada milion de tèrra lunar. Açò serie mens d’un litre per cada tona metrica de tèrra lunar.
Aquera aigua, totun, non serie glaçada, com era aigua que siguec trapada en d’autes regions ena ombra deth satellit. Mès que tanpòc serie liquida. Segontes diuèrsi cercaires que participèren en aguest nau estudi, era aigua serie laguens un aute materiau encara entà classar.
Era origina d’aquera aigua serie a trauèrs dera interaccion entre molecules d’idrogèn damb er oxigèn que i aurie ena superfícia dera Lua. En cas dera aigua glaçada, totun, es scientifics confirmèren qu’era sua origina non serie locau mès que aurie queigut ena Lua damb era ajuda de micrometeòrs.
Era Redaccion
Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita
