Louis Friedman es un d’aqueles scientifics optimistas que, maugrat las divèrsas visions que i a darrèrament sus l’exploracion espaciala, pensa qu’ara, la tòca dels umans a d’èsser Mart e solament Mart. Afirma qu’aquela planeta serà la soleta que sauvarà l’espècia umana.
Tot aquò o a publicat en un libre nòu qu’a lo nom de La exploracion espaciala umana, de Mart a las estelas (Human Spaceflight From Mars to the Stars) ont confirma que l’exploracion espaciala contunharà mas qu’anarà pas mai luenh de la planeta Mart. Mai enlà d’aquò preditz que viatjar mai luenh serà una question mentala e pas fisica. Uèi es director executiu de la Planetary Society, que fondèt amb Carl Sagan e Bruce Murray en 1980 e participèt en los projèctes Mariner-Venus-Mercury, Voyager, Magellan e Halley Comet Rendezvous. Una entrevista publicada per la revista Discover nos racònta quina es la sieuna vision sus lo futur de l’exploracion umana.
-Anarem pas mai luenh de Mart ?
– Mart es un lòc ideal per bastir de colonias umanas. Tot l’esfòrç uman anarà dirigit cap a aquela planeta. De segur qu’assajaràn de far d’autras colonias en d’autres lòcs, coma en la Luna, mas que serà pas important. Lo futur de l’espècia a solament un nom e aqueste es Mart.
– Tèrraformarem Mart ?
– Quiòc. Sabi pas quan o cossí mas aquò es un autre episodi de l’evolucion umana. E cal pensar que ja tèrraformem la Tèrra ! Encara nos cal demorar jos l’aiga o aver de colonias en Antartida. Aquò es plan mai aisit de far que non anar a Mart.
– Anarem pas mai enlà de la planeta roia ?
– L’exploracion e colonizacion se debanarà pendent centenats e benlèu milièrs d’annadas. E en aquela epòca aurem nòvas descobèrtas, en nanotecnologia, viatges espacials, engenheriá biomollecular e intelligéncia artificiala. Tot aquò farà de la Tèrra e de Mart lo nòstre ostal mai aimat.
– Aital s’enviaran pas d’umans a Saturn, Titan o Encelade ?
– Benlèu o farem abans de 2100 mas aquò serà pas gaire important. Aver de pichonas colonias en Titan serà pas decisiu per sauvar l’espècia umana. O serà Mart.
– Se pòt doncas afirmar qu’anarem pas en defóra del Sistèma Solar ?
-Es pas aquò. Aqui en la Tèrra tanben i a gent que fa d’esports de risc. Benlèu i auran païses o entrepresas qu’enviaràn d’umans per explorar comercialament planetas coma Ganimèdes, mas aquò serà totalament irrellevant. Pensi qu’ara la NASA a la tòca correcta: assajar d’arribar a Mart e poder i arribar quan abans melhor tot e los problèmas tecnics qu’avèm uèi lo jorn.
– Scientifics coma Stephen Hawking o Bill Gates ja alertan sus l’intelligéncia artificala e dison qu’es fòrça perilhosa. Que ne pensatz ?
– Ai pas tanta imaginacion. La tecnologia pòt èsser perilhosa, òc, mas cal aver totjorn prudéncia. Pensi pas coma Ray Kurzweil que lo futur de l’evolucion umana serà electronic. Serà Mart que nos sauvarà d’aquò. E podi pas dire cossí se debanarà tot d’aqui a 10.000 ans. Aquò pensi que o pòt pas dire degun.
Christian Andreu*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
