L’UNIVÈRS SERIÁ SONQUE UNA SIMULACION
Sonque una paraula pòt descriure la nòva teoria fisica publicada en la revista Scientific American sus l’Univèrs: estonament. E òc, pr’amor que segon la cercaire Fouad Khan, l’Univèrs seriá pas mai qu’una simulacion dessenhada per enganar los nòstres sens e tanben la consciéncia umana.
Per ansin, e coma se foguèsse una simulacion informatica, Khan contunhèt la teoria desvolopada en l’an 2003 per Nick Bostrom, que prepausava que l’Univèrs sonque seriá una simulacion e pro. Gigantassa, aquò òc, mas una soleta simulacion. Ara, 18 annadas aprés Khan confirmèt que i poirián aver de pròvas scientificas per o demostrar.
Segon aqueste scientific, se l’Univèrs es una simulacion, cal una sòrta de fònt, en defòra del meteis, que seriá lo solet objècte real de tot çò que vesèm. La sieuna existéncia poiriá èsser demostrada a travèrs de la velocitat de la lutz per mor qu’es ont i a tota l’informacion relativa a aquela simulacion. Aital, e segon Khan “ l’espaci es pel nòstre Univèrs çò que los nombres son per un ordinador, una realitat simulada”.
Una projeccion subjectiva
Segon Khan tot çò qu’experimentam es sonque lo sens que sèm dins un juòc nomenat vida. A mai, tanben afirmèt que la nòstra vida se desvolopa cossí fariá un film amb d’algoritmes que pòdon cambiar l’environament e lo nostres estat. Sèm pas mai, segon Khan, que de personatges dins un film, e la nòstra experiència es una amassada dels nòstres sens e l’Univèrs. A mai, çò apondèt, i a d’autres qu’agachan aquel film. E la gravetat seriá la causa de la nòstra marrida visions sus l’Univèrs.
Amb aquesta teoria Khan seriá pròche al scientific Bostrom mas tanben a Elon Musk o l’astrofisician David Kipping, que confirmèron que l’escasença de viure dins una simulacion es d’aumens 50%. D’autres cercaires, coma la fisiciana alemanda Sabine Hossenfelder, totun, diguèron qu’aquela teoria es una bestiesa e que cal pas i pensar pus: per ara, doncas, demorarà sul terrèn de la filosofia de la sciéncia e pro.
La Redaccion
