LO TRANSPÒRT DE DEMAN, ES UÈI
Anar de Marselha a Tolosa en mens de mièja ora ? Es quicòm que serà possible mercés a l’hyperloop, lo transpòrt del futur. Dempuèi 2013, mantuna companhiá trabalhan sus aquel biais de se desplaçar, dont lo primièr estudi foguèt publicat en open source per l’engenhaire american Elon Musk.
Lo problème màger, quand òm se vòl desplaçar lèu, es la friccion de l’aire qu’alentís los veïculs e aumenta lo consum d’energia. Per evitar aquela dificultat, la solucion es lo transpòrt dins de tubes jos void. L’hyperloop s’i desplaça sus de coissins d’aire mercés a de motors a induccion lineara que genèran un camp magnetic.
Atal, poiriá transportar de mèrcas e de passatgièrs mai lèu qu’un avion. A mai, Elon Musk estima qu’a tèrme long, se poirián aténher de velocitats ipersonicas. E tot aquò sens las nosenças sonòras que coneisson los que vivon pròche d’un aeropòrt.
La construccion dels tubes costariá pas tant car qu’aquò. Mantunas estimacions son estadas faitas e totes son au-dejós del prètz al quilomètre d’una linha de trin a granda velocitat. Çò que serà car, fin finala, serà la granda quantitat d’energia necessària per far baissar la pression dins los tubes. Mas Elon Musk prepausa de plaçar de panèls solars sus las estructuras per ensajar de far l’hyperloop autosufisent. Atal, lo prètz del bilhet poiriá èstre mens car que per l’avion.
Mantuna companhiá an ja començat a obrar sus de projèctes de transpòrt per hyperloop. En França, l’escòla de las Minas de Saint-Etienne trabalha per religar aquela ciutat amb Lion en 5 a 10 minutas. Als Estats-Units, Hyperloop One anoncièt lo 12 de julhet passat que lo primièr tèst de desplaçament d’un hyperloop aviá capitat. « Pel primièr còp dempuèi cent ans, un novèl mòde de transpòrt es estat presentat. Hyperloop es real, e es aquí ara. », çò anoncièt Shervin Pishevar, president executiu de la societat. Pensan prepausar los primièrs transpòrts de fret en 2019 e de viatges amb de passatgièrs tre 2021.
Auré Seguier
