Fins ara se coneissiá pas plan lo ròtle dels volcans sus la planeta. Fa gaire, de cercaires comencèron de se demandar se lor ròtle èra pas d’èsser una sortida per tornar dins l’atmosfèra lo dioxid de carbòni que deuriá demorar sus la planeta. E foguèt començat un estudi per o confirmar. La resulta n’es estonanta.
Una zòna de subduccion es un airal ont arriban de grandas quantitats de depauses oceanics. Ailà demòra lo dioxid de carbòni, que va de mai en mai prigondament dins la planeta amb lo temps. Òm pensava fins ara que la quantitat d’aqueste seriá gigantassa. Mas lo darrièr estudi demòstra que, malgrat que i aja de CO2 ailà, sa quantitat es pas tan granda, pr’amor que los volcans remandan mai de la mitat del CO2 de la planeta dins l’atmosfèra…
Lo procès geologic ara descobèrt es un dels màgers de la celèbra tectonica de las placas. La jaça qu’intra jos la superfícia terrèstra pr’amor d’aquel procès tanben utiliza los volcans coma sortida de pression. Son los volcans del Pacific, que remadan la mitat del dioxid de carbòni de la planeta tornarmai dins l’atmosfèra.
Lo procès del dioxid de carbòni
La jaça de depaus qu’intra en prigondor jos d’autras jaças terrèstras conten de material organic e inorganic mas tanben de dioxid de carbòni. Es la resulta del procès geologic conegut coma subduccion. Fins ara òm pensava que lo dioxid de carbòni èra absorbit per de plantas e demorava puèi al fons de la planeta, jos la superfícia. Lo nòu estudi, publicat dins lo numeric Science Advances, confirma que mai de la mitat del CO2 torna a la superfícia a travèrs dels volcans del Pacific e de la planeta entièra.
L’estudi voliá comprene çò que se passava amb lo dioxid de carbòni dins la region de las illas Aleutianas (Alaska). Trapèron que sa quantitat jos la superfícia èra mai pichona que çò que se pensava fins ara. S’aquò èra aital, doncas, perqué? La responsa trapada foguèron los volcans, un procès desconegut fins a uèi lo jorn.
Foguèron estudiats 17 volcans del Pacific e quins materials emeton dins l’atmosfèra. Entre lo 43% e lo 61% del dioxid de carbòni de la planeta es remandat dins l’atmosfèra terrèstra a travèrs dels volcans. La resulta de l’estudi es estada considerada coma estonanta per la comunautat de geològs de tot lo glòbe; i a plan mens de dioxid de carbòni jos la superfícia de la planeta que çò qu’òm sospechava fins a uèi, e una importanta quantitat del CO2 torna dins l’atmosfèra pels volcans. Aquò benlèu vòl dire que cal revisar los modèls climatics actuals per comprene quin es lo cicle del dioxid de carbòni sus la Tèrra. Abans que siá tròp tard.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
