Los corrents oceanics balhan de calor e de freg a la region pus septentrionala de la planeta e se poirá debanar l’esfondrament a l’Atlantic dels meteisses aperaquí l’an 2060 se l’emission de gas de sèrra contunha coma uèi. Es la resulta d’un nòu estudi qu’es desparièr de çò que diguèt fa pas gaire l’IPCC (Panèl Internacional del Cambiament Climatic). L’estudi es estat realizat per l’Universitat de Copenaga.
Per ansin, un futur plan mai freg poiriá arribar pendent lo futur a Euròpa, pr’amor de l’estudi fach per de cercaires daneses de l’Institut Niels Bohr e lo departament de Sciéncias Matematicas de l’Universitat de Copenaga. Car l’estudi confirma que se poiriá debanar un esfondrament dels corrents marins de l’Atlantic Nòrd e que balhan de calor mas tanben de freg a las còstas europèas. Tot aquò se contunha lo ritme actual de pollucion per gas de sèrra.
Los cercaires estudièron de donadas de temperatura de l’ocean pendent los darrièrs 150 ans e estimèron que l’AMOC, o Circulacion Temporala dels Corrents de l’Atlantic Nòrd, se poiriá esfondrar (amb fins a un 95% de certesa) entre los ans 2025 e 2095. Aquò es sonque en 34 ans, mas en 2027 seriá quora i a mai d’escanseças, quora los tropics serián plan mai cauds e i aurián fòrça mai tormèntas en aquela region.
“Las consequéncias poirián èsser dramaticas car Euròpa seriá pus freda e la rèsta del mond pus cauda. Mas aquò tanben provocariá una planeta pus cauda als tropics e ailà las condicions de vida actualas poirián venir insuportablas per l’èsser uman, çò diguèt Peter Ditlevsen, de l’Institut Niels Bohr. Cal redusir ja las emissions de gas de sèrra”.
Un estudi brica comun
L’estudi foguèt publicat al numeric Nature Communications, e las sieunas conclusions son plan desparièras del darrièr rapòrt de l’IPCC qu’estima qu’un esfrondrament marin dels corrents d’aquel ocean se debanarián pas pendent aqueste sègle. Totun, los cercaires avisan que i a de mai en mai senhals sus aquò. De senhals qu’uèi son trobats amb l’ajuda de l’estadistica.
Segon los cercaires, i a de senhals de cambiament de temperatura d’aquel ocean dempuèi l’an 1870, malgrat que sonque son estats estudiats al long dels darrièrs 15 ans. De remembrar qu’aqueles corrents de l’Atlantic Nòrd comencèron pendent la darrièra glaciacion e i aguèt un esfondrament dels meteisses almens 25 còps. La diferéncia es que passèron amb un cambiament de temperatura global d’entre 10 e 15 gras del còp qu’uèi poirián tanben s’esfondrar amb sonque una diferéncia de temperatura globala d’1,5ºC.
La Redaccion
