LO BIPEDISME, ENCARA MAI PRECÒÇ
Malgrat que la discussion scientifica siá pas encara barrada pr’amor que i a pas pro de fossils per o poder demostrar, se considèra que Sahelanthropus tchadensis, descobèrt en 2001, seriá l’ominin pus ancian. E semblariá que foguèsse bipède.
Lo bipedisme es considerat coma un factor clau dins l’istòria de l’evolucion umana. Pasmens, encara i a pas d’acòrdi general sus quora aquò arribèt, mai que mai per manca de fossils. Ara una còla de cercaires del Centre Nacional per la Recèrca Scientifica de l’Universitat de Peitieus a estudiat divèrses òsses de Sahelanthropus tchadensis amb mai de prigondor. L’estudi foguèt publicat dins lo numeric Nature fa gaire, e demòstra que lo bipedisme foguèt un procès plan precòç e que totjorn foguèt restacat amb lo movement sus los arbres.
L’espècia pus anciana
Sahelanthropus tchadensis visquèt fa aperaquí 7 milions d’ans e es considerat coma l’ancessor pus ancian de l’umanitat. Foguèt descrich per una còla de cercaires franceses e chadians en 2001 quand foguèt trapat dins lo desèrt de Djurab, en Chad. Ailà foguèt descobèrt un crani que confirma una forma de locomocion bipèda.
Lo crani foguèt nomenat Toumaï. Puèi foguèron trapats plusors autres òsses e se considerèt fins ara qu’èran de la meteissa espècia pr’amor que cap d’autre primat èra estat trobat en aquel luòc. Totun, se pòt pas confirmar se los òsses son del meteis individú o d’un autre. Ara, de cercaires de l’Universitat de Peitieus, e del CNRS, an publicat, fin finala, una analisi pus prigonda d’aqueles òsses.
Per ansin, d’òsses coma lo femur foguèron estudiats segon lor morfologia, lor estructura intèrna, e de mesuras biometricas a mai d’autras caracteristicas, e comparats amb d’òsses d’autres primats: de gorillas, d’orangotans, de monards del Miocèn e d’autras espècias omininas: Orrorin e Ardipithecus, d’australopitecins, e d’ancians Homo e Homo sapiens.
Lo femur a confirmat que Sahelanthropus foguèt bipède mas tanben arboricòla, e visquèt dins un ecosistèma amb d’arbres. Aquò dessepara plan Sahelantropus d’autras espècias coma lo gorilla o encara lo chimpanzé. La resulta del nòu estudi confirma mai de 20 caracteristicas pròprias de l’espècia, e totas refortisson l’idèa que lo procès del bipedisme foguèt plan precòç dins l’istòria evolutiva umana malgrat que tanben barrejat amb d’autres tipes de locomocion.
L’estudi aguèt lo sosten del govèrn francés e chadian, l’ANR e la region Nòva Aquitània, lo CNRS e l’Universitat de Peitieus. Segon los cercaires, l’analisi vòl tanben remembrar la figura d’Yves Coppens, que participèt fòrça a la descobèrta de Sahelantropus en 2001 dins lo desèrt de Chad.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
