ES CONFIRMADA L’ORIGINA DELS PTEROSAURES
Malgrat que la comunautat paleontologica, durant gaireben mai de cent ans, siá estada a discutir d’ont provenián los pterosaures, ara una còla de cercaires a confirmat lor origina mai segura: un pichonèl reptil terrèstre nomenat Scleromochlus taylori, que ne seriá l’ancessor mai luènh, e pr’amor d’aquò, l’origina de totas las espècias posterioras de pterosaures que i aguèt sus la planeta.
La confirmacion d’aquela informacion seriá arribada après que foguèt bastida informaticament l’esqueleta entièra d’Scleromochlus taylori, un pichon reptil que visquèt pendent lo Triassic, fa aperaquí 230 milions d’annadas. Amb la reconstitucion informatica de son esqueleta s’es pogut descobrir de nòus traches anatomics que confirman que lo reptil foguèt l’espècia anciana de reptil mai pròcha dels pterosaures, çò que vòl dire son ancessor pus luènh.
Un debat dobèrt pendent long temps
L’esqueleta fossila de Scleromochlus taylori foguèt descobèrta pels paleontològs fa mai de cent ans mas alavetz comencèt una granda discussion scientifica sus lo possible genre del reptil. Qualques paelontològs afirmavan qu’èra l’origina de cèrtas espècias de dinosaures. D’autres encara que semblava d’èsser un ancessor luènh dels pterosaures. Mas las rèstas trapadas ajudavan pas a decidir, fin finala, ont classificar aquel fossil.
Una de las rasons per o comprene es que i aviá un trauc negre – de milions d’ans – dins lo temps entre los diches legerpetides, dont Scleromochlus taylori, e los primièrs pterosaures de la fin del Triassic. La discussion aviá durat fins ara, quand s’es pogut bastir informaticament l’esqueleta entièra d’aquel pichon reptil. Son anatomia pareis clara.
Segon los cercaires, Scleromochlus aperten als Pterosauromorpha, un grop de reptils qu’inclutz a l’encòp los lagerpetides e los pterosaures. “Los lagerpetides visquèron fa aperaquí entre 240 e 210 milions d’ans, çò diguèt Davide Foffa, paleontològ de l’Universitat de Birmingham. E èran de reptils qu’avián las mesuras d’un can. Pasmens foguèron d’animals plan actius. Scleromochlus fasiá sonque 20 cm de long”.
“E nosautres avèm prepausat l’idèa que los primièrs reptils voladors evolucionèron a partir d’ancessors plan pichons e bipèdes, coma Scleromochlus taylori, çò apondèt Foffa”. Lo fossil demorava dins una pèira de sabla e se’n podiá pas traire cap de conclusion scientifica. Mas de poder bastir informaticament son esqueleta a permés la descobèrta de caracteristicas anatomicas que foguèron, de segur, segon los cercaires, ancessoras de las dels pterosaures posteriors. L’estudi amb l’ipotèsi d’aquela còla de cercaires es estat publicat dins lo numeric Nature.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
