AMAZON VÒL AVER DE ROBÒTS PER BALHAR DE PAQUETS
L’entrepresa Amazon confirmèt fa gaire que la siuena tòca finala èra aver de robòts per liurar de paquets als clients. E pr’açò comencèt a far de tèsts a de robòts umanoïdes que poirián, lèu, liurar aqueles paquets.
Per ansin, una fònt anomina d’AMZN.O, filiala de l’entrepresa maire Amazon, confirmèt que l’entrepresa es en tot desvolopar de software per de robòts umanoïdes que poirián remplaçar los actuals trabalhaires liuraires de l’entrepresa. La fònt que confirmèt la notícia es plan pròcha a aquela entrepresa mas volguèt demorar en l’anonimat. Benlèu pr’açò d’agéncias de notícias mondialas, coma Reuters, poguèron pas confirmar lo fach.
Lo bastiment d’un pargue per robòts
Amazon òc que confirmèt que ja comencèt a bastir çò que poiriá èsser nomenat un pargue per robòts umanoïdes. Lo luòc se situa en una de las companhiás qu’Amazon a en San Francisco, a Califòrnia, e es tot plen d’obstacles interiors per de robòts. Es ailà on Amazon a la tòca de testar divèrses tipes de robòts, dont de robòts liuraires e, segon la meteissa entrepresa, o farà lèu lèu.
D’un autre biais, Amazon es en tot desvolopar un sistèma d’intelligéncia artificiala pensat per aquel tipe de robòts. E los plans pel futur de la companhiá – e confirmat de biais oficial – es tanben crear, a mai de software, comprar d’harware a d’autras companhiás per poder contunhar amb aqueles tèsts. Amazon volguèt pas confirmar a la premsa se aqueles tèstes èran faches en defòra de l’orari abitual de la companhiá estatsunitenca.
A mai, Amazon tanben confirmèt fa pas gaire de biais oficial que lo trabalh amassa de robòts d’emmagazinatge, los trabalhaires liuraires e los magazins es un fach plan positiu per l’entrepresa qu’arriba pr’amor de l’IA. Un fach qu’ajudarà a liurar los paquets als clients encara mai lèu e qu’aquò es la sola tòca qu’a la companhiá de Califòrnia.
La Redaccion
