L’abelha es estada declarada l’animal mai important de la planeta per l’Institut Earthwatch, un organisme de la Royal Geographical Society de Londres. Segon aqueste institut, l’abelha seriá l’animal pus important de la Tèrra pr’amor de sa foncion dins l’environament. Malgrat aquò, tanben volguèron avisar qu’aquel animal ja èra pervengut a l’estapa de risc d’escantiment car mai del 90% de la populacion d’abelhas a ja desaparegut de la planeta.
Segon los scientifics que faguèron aquel classament, l’abelha seriá a mand de s’escantir per mai d’una causa e entre aquestas lo desboscament, la manca de luòcs segurs ont far los brusques, la desaparicion de las flors, l’usatge de pesticidas, e de cambiaments al sòl. Se cal alara doncas demandar perqué pòt èsser considerada coma l’animal mai important de la planeta?
Segon mai d’un scientific del Centre d’Apicultura de Chile, foguèt determinat que l’abelha es lo solet animal de la Tèrra que pòrte pas de patogèns, que sián de campairòls, de virus o de bacterias. En mai d’aquò, lo 70% de l’agricultura de la Planeta Blava depend d’aquel animal e aquò vòl dire que lo 70% de la noiridura mondiala depend de l’ajuda de las abelhas.
A mai, la pollinizacion que fan las abelhas ajuda a la reproduccion de las plantas que son la noiridura, a l’encòp, de milions d’animals, e sens elas arribariá un gigantàs escantiment de tota la fauna de la planeta. Los cercaires volguèron remembrar que, segon Albert Einstein, s’un jorn i a pas pus d’abelhas sus la planeta, l’espècia umana sonque resistirà 4 annadas abans de s’escantir.
Lo perqué de tot
Segon l’Institut Federal de Tecnologia de Soïssa, i a una teoria que poiriá èsser veraia qu’afirma que la causa màger de l’escantiment actual de las abelhas seriá las ondas dels telefòns mobils. Aquò fariá pèrdre a l’abelha son camin devèrs lo brusc e per ansin moririá.
Segon lo biològ Daniel Favre, que faguèt mai de 80 experimentacions sus d’abelhas, aquelas pèrdon totjorn la draia devèrs lo brusc quand i a d’ondas de telefòns mobils a proximitat, e aquò lor fa far un vonvon fins a dètz còps mai naut qu’en d’autras escasenças pr’amor que, perdudas, vòlon demandar d’ajuda a las autras abelhas. Mas, malgrat tot aquò, lo cercaire volguèt soslinhar que la causa principala ne seriá l’usatge de pesticidas: sonque en Colómbia e en tres annadas mai del 34% de las abelhas del país moriguèron per l’utilizacion d’agrotoxinas dins l’agricultura.
Los cercaires qu’avertiguèron d’aquel dangièr tanben afirmèron que i a tres solucions que poirián ajudar a reviscolar la populacion d’abelhas de la planeta: enebir l’usatge de pesticidas toxics sus la planeta lèu-lèu, promòure l’agricultura alternativa e far mai de recèrca scientifica sus cossí ajudar las abelhas a subreviure. Totun, tot aquò, çò confessèron, son de solucions de fòrça mal implantar e lo problèma poiriá venir lèu tras que grèu.
Un article de Christian Andreu
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
