LA LUTZ BLAVA FA VIELH ABANS
Apuèi la discussion scientifics dels darrièrs ans sus se la lutz blava de tauletas, d’ordinadors e telefonèts èra bona o pas, ara una còla de cercaires estudièt lors efièchs. La resulta foguèt estonanta apuèi se confirmar que la lutz blava es pas bona per la santat umana e que pòt far envielhir las personas.
La causa ne seriá que l’uèlh uman recep una tras que granda quantitat de lutz especialament marrida per la santat umana quand es nuèch. Per ansin, una còla de cercaires de l’Universitat Estatala d’Oregon confirmèt que poiriá afectar la longevitat dels èssers umans. La causa dirècta ne seriá la longitud d’ondadas de la lutz blava d’aqueles espleches, que, produsidas per diòdes emissors de lutz es brica bona per las cellulas del cervèl uman.
Per poder confirmar tot aquò los cercaires estudièron pendent de meses cossí aquela lutz blava aviá d’influéncia sus la mosca de la frucha, un insècte qu’a fòrça mecanismes cellulars parièrs als umans. E analizèron quala èra la responsa de la mosca de la frucha a d’exposicions jornalièras de 12 oras amb de lutz LED blava, fòrça parièra a la longitud d’ondada de la lutz blava qu’an de telefonèts e de tauletas. La conclusion foguèt clara: provòca un procès d’envielhiment mai rapid de la mosca.
Una recèrca prigonda
Segon aquel estudi ja publicat en divèrses numerics de la planeta totas las moscas que patiguèron de cicles jornalièrs de 12 oras de lutz blava apuèi aguèron una vida mai cuèrta que las que patiguèron lo quite cicle amb de lutz solara e de foscor. Per ansin, las moscas que patiguèron d’ondadas de lutz blava mostrèron de cellulas de la retina damatjadas e, a mai d’aquò, divèrses damatges en las neuronas cerebralas.
L’estudi, a mai, confirmèt que mai d’un insècte que patiguèt aqueles dans èra cèc, çò que confirmariá que las ondadas de la lutz blava son pas sonque recebudas pels uelhs. Segon los cercaires que faguèron aquel estudi, la lutz naturala es tras qu’importanta per un bon ritme circadian de l’èsser uman (los cicles de 24 oras qu’ajudan en la produccion d’ormònas e la regeneracion cellulara, aver de fam o de sòm).
Aquesta recerca scientifica seriá doncas una evidéncia mai per la tesi que ditz qu’una mai granda exposicion a la lutz artificiala entraïna de desòrdres per la sòm e tot lo ritme circadian. D’autres estudis scientifics tanben o afirman. E mai amb de lutz blava de tauletas o d’ordenadors, que lors efièchs a long tèrme son pas encara totalament coneguts uèi lo jorn.
Segon los quites cercaires a l’ora d’ara sonque pòt èsser facha una causa. Çò es seguir la lei del 20/20/20 çò es qu’apuèi agachar 20 minutas una tauleta, telefonèt o ordenador, cal agachar qué que siá, luenh d’aquela lutz blava, a mai de 20 passas e pendent 20 segondas. Sonque aquò poiriá redusir lo perilh per la santat e viure los quites ans.
La Redaccion
