Es creada una fuèlha artificiala que produsís de gas
De cercaires volguèron imitar la creacion d’energia que fan las fuèlhas de las plantas a travèrs del procès de fotosintèsi e creèron una fuèlha artificiala que produsís de gas. Lo nòu carburant, nomenat singas, poiriá èsser utilizat lèu per la produccion de carburants de tota sòrta, dins lo mond de la farmaceutica, l’industria dels plastics e tanben los fertilizants e poiriá arribar a èsser una vertadièra alternativa al petròli.
La fuèlha artificiala foguèt creada per una còla de cercaires de l’Universitat de Cambridge. Qualqu’unes d’eles i trabalhèron pendent los darrièrs set ans amb l’ajuda economica del govèrn austriac. La nomentada fuèlha artificiala sonque a de besonh de lutz solara, de monoxid de carbòni e d’idrogèn per produsir de singas.
“Lo singas es un produch brica conegut, çò diguèt Erwin Reisner, del Departament de Quimia d’aquela universitat. Mas dins la vida vidanta i a un sens nombre de produches creats amb de singas. La descobèrta poiriá èsser una passa definitiva a l’ora d’utilizar de carburants sostenibles e barrar definitivament lo cicle global del carbòni a l’atmosfèra”
Inspirats amb la fotosintèsi
Lo nòu espleche creat per aquela còla de cercaires foguèt creat aprés estudiar plan cossí funcionava lo nomentat procès natural de la fotosintèsi: una fuèlha artificiala a dos ponchs que chucan la lutz naturala coma se debana en çò de las plantas. Apuèi, aquela es mesclada amb un catalizador fach de cobalt per crear de singas. En mai d’aquò, los cercaires confirmèron qu’aquela fuèlha pòt èsser tanben jos l’aiga e que contunha de chucar aital de lutz solara. Alara es utilizat un dels catalizadors per produsir d’oxigèn mentre qu’un autre redusís lo dioxid de carbòni e d’aiga en d’idrogèn e crear lo carburant nomenat singas. E aquò vòl dire que pòt èsser usada atanplan quan i a pas de lutz solara.
“La limita d’aquela tecnologia son pas de païses fregs pr’amor que fonciona tanben mai enlà de l’estiu o quand i a gaire lutz solara, çò diguèt Virgil Andrei, autor de l’estudi que ne parla. A mai d’aquò, pòt èsser tanben usada fins la nuèch en totes los païses de la planeta”.
Ara aquela meteissa còla de scientifics vòl desvolopar aquela nòva tecnologia per far de carburant liquid, mai usat en çò de l’industria. E aquò seriá una vertadièra alternativa ecologica a l’usatge del petroli e l’epòca actuala. Los cercaires soslinhèron qu’ara cal poder cambiar lo singas en de carburant liquid per convertir aquela tecnologia en una vertadièra resòrça d’energia renovable coma l’energia eolica o fotovoltaica. Pel moment pensan qu’o poirián far lèu. La creacion de la nòva fuèlha artificiala foguèt publicada dins un estudi del numeric scientific Nature Materials.
La Redaccion
