L’estudi genetic de divèrsas populacions oceanianas poguèt, fin finala, balhar un pauc mai de lutz sus cossí se debanèt l’arribada de nòstra espècia a mai d’una illa de l’ocean Pacific. L’edat es plan luenhana; mai de 50 000 annadas, e lo luòc d’origina d’aquela colonizacion preïstorica, que durèt de milièrs d’ans, una illa que foguèt pas esperada pels antropològs: Taiwan.
Per ansin, lo nòu estudi del genòma de centenats d’indigènas oceanians donèt coma resulta trapar lo camin de lors ancessors e quinas autras populacions trobèron, se ne trobèron qualqu’una. Totun, divèrses cercaires demandèron un estudi encara pus prigond per poder confirmar aquelas nòvas resultas.
Segon de donadas arqueologicas e lingüisticas los antropològs ja avián desvolopat un patron teoric sus la populacion de las illas del Pacific, una region qu’includís Nòva Guinèa, archipèla de Bismarck, e tanben las Illas Salomon. La region auriá conegut la preséncia de l’arribada de l’òme modèrn fa aperaquí 45 000 annadas. E fa sonque 5 000 ans una nòva populacion sortiguèt de l’illa de Taiwan per tornar a colonizar aquel airal.
En 2016 foguèt confirmat que la populacion qu’aguèt coma origina Taiwan seriá estada arribada fins a Micronèsia, las illas Vanuatu e Fiji mas se crosèt jamai amb lors populacions. Puèi encara arribèt una nòva ondada qu’arribèt fins a Polinèsia fa sonque 1 000 ans.
Un estudi que confirma donadas anterioras
Lo nòu estudi, dirigit per Lluís Quintana-Murci del Collègi de França e Etiene Patin, de l’Institut Pasteur, analizèt fins a 317 ADN d’individús actuals que representavan fins a 20 populacions desparièras de l’Ocean Pacific. L’estudi tanben analizèt l’ADN de divèrsas esqueletas fossilas umanas, neandertalianas e denisovanas.
En tot estudiar de mutacions, poguèron descobrir un arbre familhal primièr e confirmèron qu’Oceania foguèt colonizada fa entre 45 000 e 30 000 ans. L’estudi foguèt publicat al numeric Nature. A mai, fa 7 000 ans d’umans modèrns sortiguèron de Taiwan e s’espandiguèron per la region. Arribèron a Filipinas, puèi Nòva Guinèa e Indonèsia. La fin de lor viatge se debanèt fa 3 000 ans, quand arribèron a las Illas Salomon e las Illas Bismarck. Pel camin, se crosèron amb de populacions autoctònas de la region.
L’ADN denisovan foguèt trapat en aquelas populacions per primièr còp fa 20 00 ans. “Los denisovans poirián aver demorat fins fa pas gaire, çò diguèt Quintana-Murci. Mas foguèron pas un grop omogenèu”. A mai d’aquò, foguèron trapats fins a 14 gèns diferents denisovans en aquelas populacions, qu’aurián ajudat a luchar contra de malautiás localas.
La Redaccion
