GIGANTOPITHECUS, FAMILHA DELS ORAGONTANS
Fins ara los cercaires sabián pas qual èra lo luòc drech a l’ora de situar Gigantopithecus dins la linha evolutiva dels primats. Mas ara, de nòvas donadas ajudèron a confirmar que Gigantopithecus blacki, lo primat mai grand que jamai demorèt sus la planeta foguèt familha luenhana dels orangotans actuals. Aital o confirmèt un nòu estudi publicat al numeric Nature.
L’estudi, dirigit per Frido Welker e d’autres cercaires confirmèt que Gigantopithecus apertenguèt a la familha dels orangotans e que lor ancessor comun visquèt ara fa entre 12 e 10 milions d’annadas, çò qu’entraïna que la divergéncia dels primats preïstorics se debanèt pendent lo Miocèn.
Gigantopithecus blacki es uèi una espècia escantida que visquèt dins las densas forèsts d’Asia del Sud-Èst. Foguèt una espècia de primat giganta, mai granda encara que los gorillas, car fasiá 3 mètres de nautor e pesava fins a 450 Kg. L’espècia foguèt descobèrta pel paleoantropològ alemand Gustav von Koenigswald en 1935 entre d’òsses d’una botiga d’Hong Kong.
Visquèt prèp de 2 milions d’ans
Uèi se sap que visquèt entre ara fa 2 milions d’ans e sonque 300.000 ans e i a de fossils d’aquesta espècia qu’includisson de dents e un tros de maissa. De fossils de Gigantopithecus foguèron trapats en China, dins la balma de Longgupo, al sud del fluvi Yantzi, dins la balma de Xinchong, a l’illa de Hainan e tanben i a d’òsses trobats en Vietnam del nòrd e Tailàndia que tanben poirián èsser d’aquesta espècia maugrat qu’encara devon èsser classats. “Abans l’analisi genetica èra pas una opcion, çò diguèt Enrico Capellini, de l’Universitat de Copenaga.
Gigantopithecus s’escantilhèt ara fa 300.000 ans e cap fossil d’aquesta espècia trobada jamai amb una edat inferior a 10.000 ans. Pr’açò s’estudièt la proteïna dentala de Gigantopithecus. E n’avèm trobada la familha mai pròcha: los orangotans”.
Pendent l’estudi los cercaires estudièren la sequéncia proteomica de l’esmalt dental d’un molar de Gigantopithecus que visquèt en la balma de Chuifang, en China, ara fa 1,9 milions d’ans. E poguèren tornar bastir la linha evolutiva de l’espècia. L’ancessor de Gigantopithecus e los orangotans se desseparèt fa ara 12 milions d’ans.
“La divergéncia comencèt durant lo Miocèn, quand viviá lor ancessor comun, çò confirmèt Frido Welker, de la meteissa universitat. La sequéncia d’una proteïna pòt donar fòrça informacion genetica en d’airals subtropicals maugrat aver 2 milions d’edat. Fins ara en d’airals umids solament se podiá far aquò amb fossils amb una edat maximala de 10.000 ans e pro”.
La Redaccion
