Pr’amor deth descorbiment de naui uassi fossils ara ja se pòt díder qu’era nòsta espècia (eth genre Homo) ei fòrça mès anciana de çò que se pensaue. Es fossils ara trapadi confirmen que i auec en Etiopia ua espècia deth genre Homo aué desconeishuda damb ua auta d’Australopithecus. E tot açò hè mès de 2,5 milions d’annades.
Es uassi fossils siguèren descorbits en airau de Ledi-Geraru, ena region etiopiana d’Afar e confirmen qu’ailà i viuèren dues espècies diferentes ; ua d’Australopithecus, tanben desconeishuda, e ua auta deth genre Homo. Aguest viuec en airau hè 2,78 milions d’annades e era espècia naua d’Australopithecus ara hè 2,63 milions d’annades.
Car rebrembar qu’era epòca (entre hè 3 e 2 milions d’annades) ei clau entara evolucion umana pr’amor que siguec quan i auèren es prumères espècies deth genre Homo mès tanben es paranthropus. Tanben ei quan ua des darrères espècies d’australopitecids desapareishec.
Ua evolucion fòrça mès complèxa
“Enquiara auiem pensat ena evolucion umana coma ua linha contunha e damb ua acceleracion quan arribèc Homo sapiens,” çò didec Brian Villmoare, dera Universitat de Nevada Las Vegas. Per contra, çò qu’auem trapat qu’ei ua mescla d’espècies e genres en diferentes epòques que viuèren amassa ».
Atau, e segontes es cercaires d’aguest nau estudi, çò que passèc ena linha umana dera evolucion tanben passèc ena linha evolutiua d’auti animaus pr’amor qu’era natura experimentèc diuèrsi còps pr’amor deth nau clima mès sec e pr’amor qu’es ancianes espècies començauen a escandilhar-se. Es cercaires trapèren enquia 13 dents des naues espècies ara descorbides.
Era naua espècia d’Australopithecus ei diferenta d’Australopithecus afarensis, que ja viuie en airau ara hè 2,95 milions d’annades. Entàs cercaires era preséncia d’andues espècies confirmarie qu’era evolucion umanan siguec mens linear e fòrça mès com se siguesse un arbe damb fòrça arrames.
Ledi-Geraru ei eth madeish lòc on es cercaires trapèren en 2013 ua maishera d’ua espècie d’Homo fòrça primitiua que visquec en airau ara hè 2,8 milions d’annades. Eth nau descorbiment confirme qu’eth nòste genre ei fòrça mès ancian que non se pensaue.
“Ara çò que cau hèr ei analisar es diferéncies entre es australopitecids e eth genre Homo per compréner com viuèren andues espècies ena epòca, çò didec Christopher Campisano, dera còla de cercaires que descorbic es uassi. En Afar i auien fòrça volcans e activitat tectonica e siguec ua d’aguestes erupcions que capturèc es individús d’aqueres espècies.”
“Cau trapar mès informacion, çò didec Kaye Reed, dera Universitat estatau d’Arizòna. Cau poder trapar mès fossils entà poder compréner ben aquera epòca e era evolucion umana ». Eth descorbiment siguec publicat ena pagina online internacionau Nature.
Era Redaccion
