Quin siguec eth prumèr programa de television d’emission periodica en aranés? Deuem viatjar enquia 1988 quan TVE 2 Catalonha comencèc es emissions d’”ERA LUCANA” ua revista divulgativa qu’ère emetuda un deluns de cada mes pendent era tarde e damb ua durada de mieja ora. Aguest programa, en desconnexion entà Catalonha e Balearas, estèc en emission dempús de 1988 enquia 1990.
Pendent es vint-e-cinc emissions, era tematica ère variada. Eth prumèr programa, coma ua introduccion, estèc dedicat a conéisher es informacions inicialas d’Aran, era lengua, era geografia, era istòria, es tradicions…
Era actualitat deth moment
Dempús, es diuèrsi capítols visitèren es pòbles aranesi, difoneren es tradicions deth territòri, … mès tanben es temes d’actualitat deth moment, coma era problematica der abitatge o era Lei d’Aran. Enguan aguesti tèmes contunhen d’èster actuaus, mès damb ua situacion diferenta, vint-e-cinc ans dempús.
Es guidons èren de Jusèp Loís Sans (eth director tanben deth programa), Paco Boya e Rafael Hinojosa, e era presentairitz ère Olga Besoli, mès tanben un parelh de capítols sigueren presentats per Paco Boya e Montse Cuny.
Eth programa se pòt veir a trauès deth següent ligam : https://www.rtve.es/play/videos/era-lucana/
Ua oportunitat formidabla entà conéisher melhor Aran e practicar era lengua, e coma mos comenten dempús de RTVE Catalonha, un aumenatge a Josep Maria Castellà. Arregraïm a Francesca Puig, jornalista de Contenguts Digitaus de RTVE Catalonha e tanben a Joan Francesc tota era informacion facilitada a SAPIÉNCIA OCCITANA.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm.
