La paleoantropologia poiriá confirmar lèu la descobèrta d’una nòva espècia ominina en Asia. L’espècia es estada nomenada, de manièra provisòria, Homo juluensis, qu’auriá viscut en China fa 300 000 ans. Segon los scientifics, foguèt una espècia amb de caracteristicas singularas: avián de caissals plan grands e un crani fins a un 40% màger que lo nòstre. Tanben an afirmat que l’espècia se poiriá èsser estada escantida alara en causa del freg.
Los scientifics que creson d’aver descobèrt aquela nòva espècia apertenon a l’Universitat d’Hawaii, e li an balhat lo qualificatiu de juluensis pr’amor que Juluren vòl dire “pòble del grand cap”. Seriá plan possible qu’Homo juluensis foguèsse estat de la familha de l’òme de Denisova –de plan nauta talha–, los ancessors siberians de nòstra espècia. L’estudi sus Homo juluensis, publicat dins Nature Communications, tanben afirma qu’Homo juluensis patiguèt l’escantiment fa sonque 250 000 ans.
De caçaires de cavals
Segon aquel estudi, Homo juluensis viviá en pichons grops e caçava de cavals salvatges per aver de carn, d’òsses e de pèls per fin de subreviure a l’ivèrn asiatic. L’estudi tanben assolida qu’aquela sason alara èra fòrça malaisida, pr’amor de las extrèmas bassas temperaturas. Segon Christopher Bae, que dirigiguèt l’estudi, Homo juluensis caçava amb d’armas de pèira.
Per arribar a aquela resulta, los scientifics analisèron fins a 16 individús, qu’an de caracteristicas tras que singularas: lo crani es gigantàs (1700-1800 cm3), en comparason amb lo crani qu’avèm uèi lo jorn (una mejana de 1200 cm3). Aquò poiriá èsser la confirmacion d’un simptòma mas pas dirèctament d’una intelligéncia màger.
Homo juluensis tanben aviá las dents plan grandas. Èran lèu coma las dels denisovans e plan mai gròssas que las dels neandertalians o d’Homo sapiens sapiens. Los denisovans visquèron en Siberia entre fa 280 000 e 300 000 ans, mentre que los especimens d’Homo juluensis foguèron trapats a Chujiayao, en China, e los scientifics an volgut soslinhar que los caissals èran tras que grands, coma los dels denisovans. Es en rason de la forma de la maissa que los expèrts creson qu’èran de la familha dels denisovans.
Segon la meteissa còla de cercaires, Homo juluensis auriá subit un fòrt declin coma espècia pr’amor de l’edat del glaç e dels terribles ivèrns asiatics d’aquela epòca. Una edat que provoquèt dirèctament una fòrta reduccion de la populacion globala ominida. Puèi, quand serián arribats los primièrs Homo sapiens sapiens, foguèron incluses dins nòstra espècia per ibridacion fa 120 000 ans.
La redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.
