Pòt un caval influenciar l’istòria umana? Bucefal, èra mai qu’un animal pel rei macedonian Alexandre lo Grand. Foguèt segurament lo sieu melhor amic fidel (amb Efestion), qu’acompanhèt lo conquistaire del mond tota la sieuna vida e sustot pendent las nombrosas batalhas.
Lo sieu nom en grèc èra una combinason de las paraulas que significavan “cap de buòu”. Las cronicas explican qu’un comerciant tessalian ofriguèt lo caval al rei Felip II de Macedònia, paire d’Alexandre, mas aquel refusèt la crompa al veire que lo caval èra indomdable, e que seriá pas util.
Lo caval perfièch
Mas lo sieu jove filh Alexandre decidiguèt que voliá crompar Bicefal e qu’el meteis demostrariá que podiá èsser un caval perfièch. Lo prètz de la crompa foguèt fòrça elevat, tretze talents (una moneda de grand valor de l’epòca). E lo futur rei del mond veiguèt que lo caractèr indomdable del caval veniá de la paur sentida al veire la sieuna pròpria ombra. Una opcion per obténer la fisança de l’animal seriá posicionar lo caval a una situacion que lo solelh poguèsse pas mostrar l’ombra de Bucefal a el meteis.
Dempuèi aquel moment, Bucefal e Alexandre venguèron inseparables. Sus la mòrt del caval existisson doas versions. Una afirma que Bucefal moriguèt per la sieuna granda edat, mas l’autra explica que lo motiu foguèron las nafraduras pendent la batalha de l’Ispades l’an 326 aC.
Bucefal recebèt divèrses omenatges e la sieuna mòrt foguèt fòrça patida per Alexandre, coma aquela del sieu amic Efestion. En onor del caval foguèt emesa moneda amb la sieuna imatge, e Alexandre fondèt la vila de Bucefalia (probablament l’actuala Jhelum al Paquistan). Efestion e Bucefal foguèron los principals supòrts del rei Alexandre lo Grand e marquèron la vida del conquistaire.
Un article de Francesc Sangar*
*Dempuèi uèi trobarètz una pichona biografia dels redactors de Sapiéncia en la seccion Qui sèm
