Home ISTÒRIA STALINGRAD 1942-43-DRÈSDA 1945
STALINGRAD 1942-43-DRÈSDA 1945
0

STALINGRAD 1942-43-DRÈSDA 1945

0

Una guèrra. Dos regims totalitaris. L’Alemanha nazi e l’Union Sovietica. Doas vilas. Drèsda e Stalingrad (dempuèi l’an 1961 Volgograd). Una destruccion totala. La Segonda Guèrra Mondial foguèt una guèrra d’efièches estonants. Cinquanta milions de mòrts e una Euròpa estrossejada. E mai se fòrça vilas patiguèron las consequéncias de la guèrra.

Adolf Hitler ordonèt conquistar la vila amb la tòca d’empedir lo transpòrt pel flume Vòlga e accedir als potzes de petròli del Caucàs. Tanben èra pas negada la volontat de destrusir una vila nomenada amb lo nòm del dirigent sovietic, Iòssif Stàlin. La Wehrmacht alemanda comencèt l’ataca lo 23 d’agost de 1942. Dempuèi Moscòu l’òrdre foguèt clara: Retrocedissètz pas. E la populacion poguèt pas partir per fugir del chaple que començava. Lo puniment per l’assag de la fugida èra l’execucion.

Al començament, l’aviacion militara alemanda, la Luftwaffe, bombardèt la vila e los soldats del Tresen Reich dintrèron dins unas carrièras plenas de bastissas destrusidas per las bombas. Mas la resisténcia sovietica foguèt tanben ferotja e podèm dire que cada carrièra, cada ostal foguèt un camp de batalha.

L’arribada del general ivèrn

Dos milions de mòrts entre las doas armadas e lo 95% de la populacion de la vila.

E arribèt l’ivèrn rus, e las tropas alemandas podián pas recebre de municions nimai de neuritura pels soldats. La mortalitat èra enòrma e malgrat lo negatge de Berlin, lo marescal alemand Friedrich Paulus se rendèt entre lo 31 de genièr e lo 2 de febrièr de 1943. Aquela victòria sovietica donèt fòrça energia a l’Armada Roja per contunhar las atacas contra los nazis. Mas la resulta d’aquela batalha foguèt fòrça clar: gaireben dos milions de mòrts entre las doas armadas e lo 95% de la populacion de la vila.

En Febrièr de 1945 los aliats avián començada l’envasion contra lo Tresen Reich. La vila de Drèsda patiguèt un bombardament aerian que destrusiguèt lo 90% de la vila. La Royal Air Force britanica e las Fòrças Aerianas de l’armada dels Estats Units lancèron gaireben 1.700 tonas de bombas sus la vila. La propaganda nazi parlèt de dos cents mila mòrts pendent l’atac, mas qualques estudis posteriors ne parlan d’una quantitat inferiora, segurament vint-e-cinc mila victimas.

Drèsda foguèt escolhida pr’amor qu’èra una vila amb una importanta preséncia de fabricas militaras que provesissián de material a l’armada del Tresen Reich. Mas Drèsda, una vila istorica, e la siuena populacion paguèron las consequéncias amb una destruccion enòrma.

Ambedós regims èran totalitaris, lo nazi e lo sovietic, e qe respectavan pas los dreches que nomenariam uèi umans mai essencials. Fin finala, lo Tresen Reich desapareisseriá tres meses après, l’Union Sovietica subrevisquèt qualques decadas. Mas qui foguèt la victima de la guèrra? La populacion civila. Aquelas son las consequéncias de las guèrras. E quand acaban, la majoritat dels subrevivents remembran pas las causas que las comencèron. Mas fòrça cadièras als ostals demòran vuèdas.

Un article de Francesc Sangar*

*Dempuèi uèi trobarètz una pichona biografia dels redactors de Sapiéncia en la seccion Qui sèm

Christian Andreu Nasquèt a Barcelona en 1972, estudièt jornalisme a l’Universitat Autonòma de Barcelona e son especialitat es la politica internacionala. Parla uech lengas dont l'occitan. A publicat lo libre Art i Lletres a Horta-Guinardó e a collaborat totjorn amb de jornals catalans, bascos e occitans coma La Veu del carrer, El Punt, Egin, A vòste e Jornalet. Es maridat, a dos enfants, Jana e Roger, e demòra a Reus.