EN TOT BASTIR ETH LENGUATGE

Un nau estudi scientific confirmèc qu’eth bastiment deth lenguatge comencèc hè fòrça temps, fòrça abans que non se pensaue; hè aperaquí 40 milions d’annades. Segontes aguest estudi es monards e es prumèri primats ja aurien començat a comunicar-se sonque damb sons, un estadi que situarie eth començament deth bastiment deth lenguatge en aquera alunhada epòca.

Segontes açò, aué eth lenguatge serie tipicaments uman e traçar-ne era sua origina prumèr serie fòrça dificil. Totun, se enquiara se pensaue qu’eth lenguatge ei un tipe de comunicacion sonque uman, naues pròves demostrarien que d’auti animals tanben n’an e qu’era sua origina aurie un long camin, pr’amor qu’es prumèri primats e abans d’aqueri, es prumèri monards, ja aurien començat a bastir un tipe de comunicacion damb sons que serie eth prumèr tipe de lenguatge ena planeta. Er estudi siguec publicat ena revista online Science Advances.

Atau, poder determinar exactaments quan se passèc per prumèr còp aqueth tipe de comunicacion serie fòrça important entara umanitat pr’amor que se poirie tanben determinar des deth punt de vista scientific quan comencèrem a èster umans.  E ara ua còla internacionau de cercaires dirigida per Simon Townsend podec trapar quauqu’ues traces.

Eth hèt ei que bastir un lenguatge ei un hèt fòrça dificil en mon animau. Se didem per exemple ua frase com “un gosset mosseguèc un gat” cau saber bastir ua paraula prumèr e dempús ua auta. E eth significat des paraules a de díder quicòm. Se non, non i a lenguatge. E comprenem que siguec eth gosset que mosseguèc eth gat e non eth gat eth gosset pr’amor que coneishem eth madeish lenguatge.

“Era majoritat des animals non an un lenguatge pròpri e donques çò que volíem conéisher ei s’aguesti animals auien o non un sistèma de comunicacion naturau pròpi e diferent, çò diguec Stuart Townsend, cercaire dera Universitat de Zurich. E çò qu’auem hèt entà ensajar de compréner tot açò siguec bastir gramatiques artificiaus sonque damb sons entà veir se es animals interpretauen eth significat tostemps dera madeisha manèra, çò que volie díder qu’aqueri sons èren tanben un tipe de lenguatge”.

Compreneson entre diferentes espècies

Açò ajudèc a compréner melhor era abilitat qu’an diuèrses espècies de primats entà se comprene. Er experiment siguec hèt damb tres espècies diferentes de primats e totes tres se comprenien ben maugrat que non auien era madeisha lengua. Atau, es oistitis, es chimpanzés e es umans podien se comprene a trauèrs de diferents sons mès tanben de senhals visuaus.

compréner aguest tipe de comunicacion verbau e non verbau ei un hèt fòrça fòrça espandit entre totes es espècies qu’apartien ara familha des primats, çò confirmèc Townsend. E açò ei un hèt fòrça important pr’amor que vò díder qu’es prumèri assags de comunicacion e donques es prumères bases deth lenguatge ja sigueren hètes pes nòstes ancessors primats mès ancians. E açò tanben vò díder qu’era evolucion deth lenguatge ei un procès que comencèc entra ara hè 30 e 40 milions d’annades, fòrça temps abans que non se pensaue”.

Era Redaccion

Aguest article ei publicat gràcies a un acòrdi de cooperacion damb www.aranes.club, era pagina web entà apréner aranés de forma gratuita