Tre los ans 1946 e 1958 lo govèrn dels Estats Units realizèt divèrses assages nuclears dins las illas Marshall (dins l’ocean Pacific), alara territòri estatsunidenc. Doas d’aquelas illas, Bikini e Enewetck, patiguèron una pollucion terribla pr’amor d’aqueles assages. Òr, un nòu estudi scientific confirma qu’an encara mai de radioactivitat uèi lo jorn que Chernobyl e Fukushima amassa.
Lo pièger assag nuclear aguèt luòc lo 1r de març de 1954, quand espetèt l’arma nucleara pus poderosa que los Estats Units avián a aquela epòca. La bomba, sonada Castle Bravo, liberèt una energia parièra a 15 megatonas e l’illa de Bikini encara ne patís uèi las consequéncias.
Dempuèi alara las illas Marshall tenguèron una leugièra creissença demografica. Mas una partida de la populacion d’aquelas illas poguèt pas jamai tornar a lors ostals en rason de la contaminacion nucleara.
De nivèls encara tròp nauts
“Avèm fach tres estudis sus aquelas illas e la conclusion es estonanta; los nivèls de radiacion nucleara son encara pus nauts encara que lo limit pachat entre los Estats Units e la Republica de las illas Marshall, çò diguèt Emlyn Hughes, cap de l’estudi realizat per l’Universitat de Columbia. Los nivèls d’americi-241, cèsi-137, plutòni-238 e plutòni-239 son encara tròp nauts en 11 d’aquelas illetas”.
En mai d’aquò, los cercaires estudièron mai de 200 fruches d’aquelas illas, coma de cocòts o de pandanus, e descobriguèron que la contaminacion es pus nauta que totes los limits internacionals de seguretat nucleara. L’exposicion a la contaminacion nucleara es encara tròp nauta e l’èsser uman i pòt pas viure. L’estudi foguèt publicat dins la revista numerica Proceedings of the National Academy of Sciences.
La Redaccion
Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion
