Seriá una plan bona notícia se aquel mamifèr carnivòr foguèsse pas estat classat coma prèp de l’extincion. Lo govèrn indian confirmèt que lo nòu cens fach sus la populacion de tigres que i a en aquel país (la populacion pus granda de la planeta) a ongan una bona conclusion: en 2019 i a en Índia 3000 tigres censats, çò es un tèrç mai que en 2014, quand se realizèt lo darrièr cens.
Per ansin, lo primièr ministre del govèrn indian, Narendra Modi, confirmèt aquesta quita setmana que lo cens qu’Índia fa cada quatre annadas sus la populacion de tigres en aquel país pòt confirmar la preséncia reala de 2967 tigres. Per contra, lo cens de 2014 confirmava qu’en Índia solament i avián 2226 tigres. Pr’aquò lo politic afirmèt tornarmai qu’Índia “es l’abitat lo pus grand e lo pus segur per aquela espècia”.
Un cens amb d’espèr
Lo cens dels tigres d’Índia (que se pensa qu’es on abita lo 70% de l’espècia a nivèl mondial), es fach sonque cada 4 annadas pr’amor que de centenats de cercaires e foncionaris devon los cercar dins pus de mièg milions de quilomètres carrats.
La nòva chifra d’aperaquí 3000 tigres es estada considerada un vertadièr succès apuèi lo chaple que l’espècia patiguèt tre las annadas 1875 e 1925, quora pus de 80.000 tigres foguèron caçats. Aquò vòl dire qu’en 1875 Índia aviá una populacion de pus de 100.000 tigres. Per contra, uèi, solament ne demoran mens de 3000.
Totun, de nòvas leis per protegir los tigres – un animal d’aquela espècia podiá pas èsser caçat maugrat atacar de vilatges- ajudèron plan l’espècia pendent lo sègle XXen. En 1972 una nòva lei environamentala arrestèt gaireben la caça illegala del tigre pr’amor que foguèt enebit de lo tuar tanben quand l’animal foguèsse problematic.
La lei arribèt aprés la pression de mantuns grops de conservacion animala en Índia. Çò que demòstra que, quora òm vòl, tot pòt èsser fach. La planeta serà (o pas) sauvada, sonque se l’umanitat vòl o far.
La Redaccion
