DESCOBÈRTA D’UNA ENZIMA QUE MANJA DE PLASTIC

Lo problèma del plastic per l’environament, a nòstra epòca, es tras qu’alarmant. N’i a dins los oceans e pertot. Aürosament, ara, e mentre que degun o podiá pas pensar, de cercaires an trobatt cossí crear una enzima que manja lo plastic de las botelhas, un tipe de textil e de tapisses. Una bona nòva per la lucha contra lo cambiament environamental.

La descobèrta scientifica aguèt luòc quand una còla internacionala de cercaires dels Estats Units, d’Anglatèrra e de Brasil èra a analisar l’estructura del dich PET (polietilèn tereftalat), la matèria basica utilizada dins d’objèctes plastics coma de botelhas de bevenda o de tapisses.

Otra aquò, decidiguèron d’estudiar una enzima naturala desvolopada dins un centre de reciclatge japonés e qu’ajuda la bacteria Ideonella sakaiensis a fondre lo plastic. La tòca èra de ne determinar l’estructura mas un accident ajudèt a crear l’enzima que manjava totes los plastics faches amb de polietilèn.

“L’azard a totjorn jogat un grand ròtle dins la recèrca scientifica e nòstre trabalh foguèt pas desparièr –çò diguèt John Mc Geehan, cercaire de l’universitat anglesa de Portsmouth–. La trobalha es modèsta, mas ideala pr’amor que dobrís lo camin a la creacion de nòvas enzimas e a arribar, enfin, a poder resòlver lo reciclatge de totas las montanhas de plastic que i a sus la planeta”.

Una enzima particulara

Los cercaires an confirmat que la nòva enzima creada a de caracteristicas particularas e que foguèt desvolopada dins un environament ont i aviá de plastics. Pendent lo trabalh scientific i aguèt una mutacion sonada S238F/W159H, ideala per far aparéisser una enzima que mangèsse de plastic.

D’autre caire, la còla de cercaires confirmèt que la nòva enzima tanben pòt degradar de polietilèn furandicarboxilat, tanplan apelat PEF, un susbtitut biologic utilizat tanben per far d’objèctes de plastic e que dempuèi fa gaire es utilizat, de mai en mai, coma lo nòu material per far de botelhas de bevenda.

La còla de scientifics, qu’a publicat un estudi en tot confirmar la descobèrta al numeric Proceedings of the National Academy of Sciences considerèt qu’amb aquela tecnologia tot se podiá far. “Lo procès de creacion foguèt parièr a l’utilizat pendent la creacion de detergents biodegradables o plusors biocarburants –çò soslinhèt Mc Geehan–. La tecnologia emplegada existís dempuèi longtemps e aquò vòl dire que las escasenças de reüssir dins la lucha contra los plastics son mai que realas”.

Ara los cercaires vòlon trabalhar amb l’industria per aplicar aquela enzima amb los plastics que contenon de polietilèn o d’autres tipes de substrats que poirián plan èsser manjats per d’enzimas coma aquela. Atal, dison, poirián èsser recicladas dins la quita bastida ont foguèron utilizadas. E aquò cambiariá fòrça lo reciclatge, que seriá pas coma es conegut uèi lo jorn.

La Redaccion

Aqueste article serà tanben publicat dins Jornalet, lo primièr quotidian en linha de lenga occitana, amb lo qual Sapiéncia a un acòrdi de cooperacion.